У EPAM будзе новы гендырэктар. Вось што пра яго вядома

Фейеш далучыўся да кампаніі ў 2004 годзе, стаўшы яе першым тэхнічным дырэктарам. Гэта адбылося пасля таго, як EPAM набыла венгерскую фірму Fathom Technology, якую Фейеш заснаваў сам і ў якой працаваў тэхдырэктарам. Да стварэння Fathom Technology ён займаў розныя тэхнічныя кіраўнічыя пасады ў кампаніях Great Plains (цяпер Microsoft Business Solutions) і Scala Business Solutions.

На пасадзе тэхдырэктара EPAM Фейеш заставаўся да жніўня 2012 года. Да чэрвеня 2024 года ён быў прэзідэнтам па рынках Еўропы і Азіяцка-Ціхаакіянскага рэгіёна — каардынаваў рыначную дзейнасць і глабальныя бізнес-аперацыі кампаніі ў гэтым рэгіёне, а таксама ўзначальваў падраздзяленне банкаўскіх і фінансавых паслуг EPAM.

На дадзены момант Фейеш займае пасады прэзідэнта глабальнага бізнесу і дырэктара па даходах EPAM. Ён кіруе ўзаемадзеяннем з кліентамі, адказвае за рыначную актыўнасць кампаніі і глабальныя бізнес-аперацыі EPAM.

У прэс-рэлізе Добкін адзначыў, што Фейеш валодае рэдкім спалучэннем стратэгічнага бачання і глыбокіх тэхнічных ведаў, што забяспечыць далейшае развіццё кампаніі.

Фейеш базуецца ў швейцарскім Цюрыху. Яму 49 гадоў, і ён адзін з самых маладых топ-менеджараў EPAM. Яго гадавы заробак складае прыблізна $870 тысяч. Фейешу належыць 13334 акцыі кампаніі на суму больш за $2 млн. У канцы лютага ён прадаў 3470 акцый на $1 млн.

Увогуле ў EPAM працуюць два чалавекі з імем Балаш Фейеш: яны нават абазначаны як FB1 (новы генеральны дырэктар) і FB2. Другі Фейеш курыруе дзейнасць EPAM у Азіяцка-Ціхаакіянскім рэгіёне як віцэ-прэзідэнт і жыве ў Ганконгу. Яны працуюць разам каля 30 гадоў, а нумарацыя ўзнікла таму, што Фейеш-гендырэктар першым далучыўся да кампаніі AblakSoft, у якой яны абодва калісьці працавалі.