ЕС пачаў расследаванне праз праграму TikTok Lite

Рэгулятар праверыць дзейнасць сацсеткі на наяўнасць магчымых парушэнняў закона «Аб лічбавых паслугах» ЕС (DSA). Пытанні Еўракамісіі выклікала сістэма ўзнагароджанняў карыстальнікаў, якая дазваляе зарабляць балы за прагляд відэа ці лайкі, што можа прывесці да прывыкання і негатыўна адбіцца на псіхалагічным здароўі непаўналетніх.

На думку рэгулятара, праграма Task and Reward Program была запушчаная «без папярэдняй дбайнай ацэнкі рызык, якія яна цягне за сабой, у прыватнасці, звязаных з адыктыўным эфектам платформаў, і без прыняцця эфектыўных мер па зніжэнні рызыкі». Раней Еўракамісія запатрабавала ад сацсеткі тэрмінова даслаць справаздачу аб ацэнцы рызык, звязаных з запускам TikTok Lite.

TikTok не выканаў гэтага патрабавання, што пацягнула расследаванне. Цяпер у кампаніі ёсць час да 24 красавіка, каб даць поўную справаздачу аб ацэнцы рызык. Да 3 мая неабходна даць іншую патрэбную інфармацыю. У выпадку невыканання патрабаванняў сэрвісу пагражае штраф у памеры 1% ад агульнага гадавога даходу або глабальнага абароту.

Таксама Еўракамісія мае намер прыпыніць праграмы ўзнагароджанняў TikTok Lite у ЕС да ацэнкі іх бяспекі. У кампаніі заявілі, што расчараваныя рашэннямі еўрапейскага рэгулятара і праграма ўзнагароджання недаступная для асоб маладзейшых за 18 гадоў.