Еўрапейскія кампаніі адмаўляюцца ад амерыканскіх воблачных сэрвісаў праз Трампа

Паводле еўрапейскіх воблачных правайдараў, за апошнія два тыдні значна павялічылася колькасць кліентаў, якія хочуць перайсці з паслуг Google Cloud, Microsoft Azure і Amazon Web Services на мясцовыя альтэрнатывы.

Асцярогі звязаныя з нестабільнасцю дамовы аб перадачы дадзеных паміж ЕС і ЗША, некалькі версій якой былі аспрэчаныя ў еўрапейскіх судах, звальненнем дэмакратаў з Савета па наглядзе за канфідэнцыйнасцю і грамадзянскімі свабодамі ЗША, а таксама з законам CLOUD Act, які дазваляе амерыканскім праваахоўнікам патрабаваць карыстальніцкія дадзеныя ў тэхналагічных кампаній.

18 сакавіка Палата прадстаўнікоў Нідэрландаў прыняла восем рэзалюцый, што заклікаюць урад скараціць залежнасць ад амерыканскіх ІТ-кампаній і перайсці на еўрапейскія альтэрнатывы. Некалькімі днямі раней больш за 100 арганізацый падпісалі адкрыты ліст да еўрапейскіх чыноўнікаў з заклікам зрабіць кантынент «больш тэхналагічна незалежным». Яны адзначылі, што сённяшняе становішча стварае «пагрозу для яго бяспекі і ўстойлівасці».

«У нас расце попыт па ўсёй Еўропе», — распавёў выданню генеральны дырэктар швейцарскага правайдара Exoscale Матыяс Нёбаўэр, падкрэсліўшы катэгарычнасць некаторых кліентаў. «Асабліва кліенты з Даніі выразна далі зразумець, што хочуць адмовіцца ад амерыканскіх гіперскейлераў з-за новай адміністрацыі Белага дома і іх слоў пра Грэнландыю», — дадаў ён.

Аднак эксперты адзначаюць, што міграцыя з амерыканскіх воблачных сэрвісаў зойме шмат гадоў з-за велізарных аб’ёмаў дадзеных, якія захоўваюцца, і адсутнасці раўнацэнных еўрапейскіх альтэрнатыў.

Адмова ад амерыканскіх тэхнакампаній не абмяжоўваецца воблачнымі правайдарамі. З сярэдзіны студзеня колькасць наведвальнікаў сайта European Alternatives вырасла больш як у 13 разоў. На гэтым рэсурсе сабраныя самыя розныя сэрвісы — ад музычных стрымінгаў да інструментаў для абароны ад DDoS-атак.