У Мінску чамусьці скасавалі танкавы фестываль ад Lesta на 9 мая. Хатажаеў абяцаў «мегападзею»

У інтэрв’ю каналу АНТ, якое выйшла ў канцы сакавіка, кіраўнік кампаніі «Леста Игры» Малік Хатажаеў анансаваў «мегападзею», якая рыхтуецца ў Мінску да 80-годдзя Перамогі. І запрасіў усіх на Нямігу 10 мая.

— Мы плануем мегападзею, — сказаў Хатажаеў. — Цяпер, напэўна, рана пра яе казаць, хутка ўсё прагучыць. <…> 10 мая на Нямізе будзе вялікае гарадское свята, прысвечанае 80-годдзю. Там будзе кіберспорт, выступленні артыстаў. Мы ў ім возьмем удзел. Гэта будзе вялікая гарадская падзея. Прыходзьце — будзе здорава.

Ён таксама падкрэсліў, што падрыхтоўка да юбілею ідзе ўжо год, і кампанія выкладваецца «па максімуму», будзе «купа ўсяго», у тым ліку «шыкоўны парад».

У канцы красавіка з’явіліся падрабязнасці пра ўдзел «Лесты» ў гарадскім сямейным фестывалі «Наша Перамога» 10 мая. Сайт WOT Express (навіны «Мира танков» і World of Tanks) апублікаваў буклет з зонамі актыўнасцяў «Лесты» каля Палаца спорту. Сярод іх — сіламер, баскетбол, цір, хулахуп, паласа перашкод. А яшчэ — мерч «Мира танков», зона выдачы ўзнагарод, зона Q&A.

Цяпер публікацыя суправаджаецца абнаўленнем: «Танкавы фестываль адмяняецца».

Галоўнай падзеяй танкавага фестывалю (а ўдзел «Лесты» сайт менавіта так і назваў) быў запланаваны фінал «Кубка Беларусі» — кіберспартыўнага турніру з прызавым фондам 50 тысяч BYN, які пачаўся анлайн яшчэ 14 красавіка. Цяпер на афіцыйным сайце гульні «Мир танков», на старонцы «Кубка Беларусі», стаіць такая плашка:

Пры гэтым, хто цяпер арганізатар, незразумела.

А на старонцы «Мира танков» у VK на пачатку мая з’явілася аб’ява пра перанос фіналу «Кубка Беларусі» «на пазнейшы перыяд па тэхнічных прычынах». І нават пра адмену сямейнага фестывалю.

Між тым, сямейны фестываль усё ж адбудзецца. Ён ёсць у праграме Мінгарвыканкама, праўда, ў анонсе нічога не гаворыцца пра «Мир танков»:

«У суботу, 10 мая, з 12 да 23 гадзін на пляцоўцы каля Палаца спорту на праспекце Пераможцаў пройдзе сямейнае свята „Наша Перамога“. Тут адбудуцца канцэрты, будзе працаваць палявая кухня. Мінбароны падрыхтавала выстаўку сучаснай ваеннай тэхнікі».

А вось як піша пра фестываль «Камсамольская праўда»:

«10 мая на пляцоўцы каля Палаца Спорту з 12.00 да 23.00 адбудзецца сямейны фестываль „Наша Перамога“. Будуць працаваць фудкорты. Акрамя таго, размесціцца і вялікі кірмаш падарункаў ручной работы „Гарошак-маркет“. Гасцям фестывалю прапануюць шмат актыўнасцяў. Таксама будуць працаваць лакацыі хакейнага клуба „Дынама-Мінск“, разнастайныя выстаўкі і многае іншае. А 15.00 пачнецца маштабны канцэрт з удзелам папулярных беларускіх і расійскіх артыстаў. Хэдлайнерам свята стане спявак Niletto».

Чытач devby, знаёмы з арганізацыяй танкавага свята, паведаміў нам, што ўсе мерапрыемствы з удзелам «Лесты» былі адмененыя па рашэнні дзяржаўнага заказчыка «пасля навін з РФ».

Нагадаем, у канцы красавіка Генпракуратура Расіі папрасіла суд забараніць дзейнасць у краіне «экстрэмісцкага аб’яднання», у склад якога, па версіі ведамства, уваходзіць уладальнік расійскай кампаніі «Леста Игры» Малік Хатажаеў і ўласнік Wargaming.net Віктар Кіслы. Ведамства таксама запатрабавала канфіскаваць на карысць дзяржавы 100% доляў у статутным капітале «Леста Игры», а менавіта трох яе ТАА: «Леста», «Леста Геймс Эдженси» і «Леста Геймс Москва». Крыху раней стала вядома, што на актывы юрыдычных асоб быў накладзены арышт. Падаецца, расійскую кампанію падазраюць у сувязях з Wargaming і дапамозе УСУ.