Flo пагадзілася ўрэгуляваць калектыўны пазоў, у якім сцвярджалася, што яна незаконна перадавала адчувальныя персанальныя дадзеныя мільёнаў карыстальніц старонім кампаніям.
Flo пагадзілася ўрэгуляваць калектыўны пазоў, у якім сцвярджалася, што яна незаконна перадавала адчувальныя персанальныя дадзеныя мільёнаў карыстальніц старонім кампаніям.
Аб пагадненні сэрвіс для жаночага здароўя абвясціў 31 ліпеня. Пазоў быў пададзены ў 2021 годзе ў Акруговы суд Паўночнай акругі Каліфорніі. Кампанію абвінавацілі ў незаконнай перадачы медыцынскіх дадзеных — уключаючы дадзеныя аб менструальным цыкле, настроі, сімптомах, сэксуальнай актыўнасці і вазе — мільёнаў жыхарак ЗША «дзесяткам старонніх кампаній», якія атрымалі магчымасць выкарыстоўваць іх у рэкламных мэтах. Сярод адказчыкаў згадваліся Meta і Google, а таксама рэкламная кампанія AppsFlyer і цяпер неіснуючая аналітычная фірма Flurry.
Згодна з пазовам, дадзеныя перадаваліся нягледзячы на палітыку канфідэнцыйнасці і публічныя запэўніванні Flo ў тым, што яна не будзе гэтага рабіць без яўнай згоды карыстальніц. Пры гэтым, як сцвярджаецца, трэція бакі не былі абмежаваныя ў выкарыстанні гэтых дадзеных. У мінулым Федэральная гандлёвая камісія ЗША абвінавачвала кампанію ў фальшывых заявах і праводзіла праверку яе практык канфідэнцыйнасці, але справа была ўрэгулявана ў тым жа 2021 годзе.
Па каліфарнійскім пазове адвакаты запытвалі мінімальную кампенсацыю ў $1 тысячу на чалавека. З улікам таго, што на момант падачы аплікацыя налічвала больш за 38 млн актыўных карыстальніц, а пазоў ахопліваў усіх карыстальніц Flo у ЗША з чэрвеня 2016 па студзень 2021 года, патэнцыйныя страты для адказчыкаў маглі скласці астранамічную суму.
У пачатку ліпеня Google заключыла папярэдняе міравое пагадненне з пазаўнікамі, Flurry пайшла на міравую ў сакавіку. Пазоў супраць AppsFlyer быў адкліканы ў 2022 годзе. Meta засталася адзіным адказчыкам у судовым разборы, які пачаўся 21 ліпеня.
Пагадненне з Flo было дасягнута праз дзень пасля таго, як федэральны суддзя Джэймс Даната заявіў аб адсутнасці доказаў парушэння каліфарнійскага заканадаўства аб канфідэнцыйнасці медыцынскай інфармацыі, што стала «непераадольнай праблемай» для пазаўнікоў.
Flo сваю віну не прызнала і кажа, што «задаволена» развязкай. «Мы заўсёды сцвярджалі, што абвінавачванні беспадстаўныя, і па меры развіцця справы адсутнасць доказаў стала ўсё больш відавочнай у судзе», — адзначылі ў кампаніі.
Сутнасць пагаднення не раскрываецца. Цяпер яно павінна атрымаць канчатковае ўхваленне суда.
Рэлацыраваліся? Цяпер вы можаце каментаваць без верыфікацыі акаўнта.