Францыя аштрафавала Google на 250 млн еўра за навучанне АІ на навінах
Французскае ўпраўленне па наглядзе за канкурэнцыяй аштрафавала кампанію на 250 мільёнаў еўра за парушэнні дзейных у ЕС нормаў у дачыненні да інтэлектуальнай уласнасці.
Рэгулятар удакладніў, што гаворка вядзецца пра чат-бот Google Bard, пераназваны ў Gemini. Бот навучаўся на кантэнце выдаўцоў і інфармацыйных агенцтваў без апавяшчэння праваўладальнікаў. Google пагадзілася ўрэгуляваць прэтэнзіі ведамства і не стала аспрэчваць яго высновы. Таксама кампанія прапанавала шэраг мер для ліквідацыі недапрацовак.
Раней найбуйнейшыя навінавыя выданні краіны, у тым ліку Agence France Presse, падалі скаргу на кампанію ў сувязі з парушэннем аўтарскіх правоў. Спрэчку ўрэгулявалі ў 2022 годзе. Google адклікала апеляцыю на штраф у памеры 500 мільёнаў еўра. Цяпер рэгулятар устанавіў, што кампанія парушыла чатыры з сямі пунктаў пагаднення з выдаўцамі.
Паводле версіі ведамства, увесь гэты час Bard навучаўся на даных СМІ без апавяшчэння праваўладальнікаў. Іншыя распрацоўшчыкі АІ-мадэляў таксама атрымліваюць пазовы ад СМІ. Супраць OpenAI адкрытая справа па пазове Тhe New York Times, газета абвінавачвае кампанію ў выкарыстанні сваіх матэрыялаў для навучання чат-бота ChatGPT.
Читать на dev.by