FT: Apple пераваблівае дзясяткі інжынераў з Google для свайго АІ-праекта

Паводле даных Financial Times, апошнім часам Apple масава наймае супрацоўнікаў для пашырэння падраздзялення па АІ і машынным навучанні. Пра гэта кажа аналіз профіляў LinkedIn, колькасці вакансій і публікаваных даследчых работ. Больш за ўсё новых супрацоўнікаў прыйшло з Google.

Самым значным стаў пераход кіраўніка лабараторыі АІ Google Brain Джона Джанандрэа, які ў 2018 годзе пакінуў кампанію і прыйшоў на кіроўную пасаду ў галіне АІ у Apple. Затым за ім услед пайшло не менш за 36 інжынераў Google. Падраздзяленне Google Brain пасля аб’ядналі з DeppMind.

Выданне высветліла, што акрамя асноўных офісаў у Каліфорніі і Сіэтле кампанія значна пашырыла офіс у Цюрыху. Таксама Apple набыла два мясцовыя стартапы: распрацоўніка тэхналогій VR FaceShift і стваральніка сістэм распазнання малюнкаў Fashwell. Акрамя таго, кампанія стварыла даследчую лабараторыю Vision Lab, якую трымае ў сакрэце.

Традыцыйна Apple не распавядае пра свае планы ў галіне АІ, у адрозненне ад канкурэнтаў. СМІ паведамлялі, што цяпер кампанія сканцэнтравана на разгортванні генератыўных мадэляў на мабільных прыладах і плануе зрабіць іх лакальнымі, а не воблачнымі. Таксама Apple нібыта вядзе перамовы з Google і Microsoft аб выкарыстанні іх мадэляў.

Акрамя Джанандрэа ў Apple працуюць іншыя выхадцы з Google. Старшы дырэктар па даследаваннях АІ і машыннага навучання Самі Бенджыа быў вядучым навукоўцам Google у гэтай галіне. Кіраўнік кампаніі Apple Foundation Models, які працуе над вялікімі моўнымі мадэлямі, Руомінг Панг кіраваў даследаваннямі Google па распазнанні маўлення з дапамогай ІІ.

Financial Times адзначае, што лакальнае разгортванне АІ-мадэляў запатрабуе больш магутных чыпаў з дынамічнай аператыўнай памяццю (DRAM). Сёння сярэдні аб’ём памяці на смартфоне складае 8 Гбайт, тады як для працы вялікіх моўных мадэляў на прыладзе патрабуецца не менш за 12 Гбайт.

Акрамя таго, Apple асцярожна падыходзіць да тэрмінаў ўкаранення АІ ў iPhone, бо не жадае выпускаць інструмент, які выдае недапушчальныя адказы, што не адпавядаюць рэчаіснасці. Чакаецца, што кампанія раскажа пра свае поспехі на канферэнцыі распрацоўшчыкаў WWDC, якая пройдзе ад 10 да 14 чэрвеня.