Gemini перамагла ў алімпіядзе па праграмаванні. Google называе гэта «прарывам»

У Азербайджане ў фінале Міжнароднай студэнцкай алімпіяды па праграмаванні (ICPC) Gemini 2.5 Deep Think упершыню ў гісторыі заваявала залаты медаль сярод 139 каманд з усяго свету. Больш таго, Gemini вырашыла задачу па аптымізацыі размеркавання вадкасці праз сетку труб і рэзервуараў, з якой не справіліся ні расійскія, ні кітайскія, ні японскія студэнцкія каманды.

Мадэль паспяхова справілася з 10 з 12 задач, паказаўшы вынік, роўны другому месцу сярод лепшых студэнтаў-праграмістаў планеты. Пры гэтым Gemini выдаткавала менш за паўгадзіны на вырашэнне самай складанай задачы, у той час як людзям гэта аказалася не пад сілу. Google ахарактарызавала гэта як «глыбокі скачок у абстрактным мысленні» і крок да стварэння AGI — штучнага інтэлекту агульнага прызначэння.

Па словах віцэ-прэзідэнта DeepMind Куока Ле, перамога ў алімпіядзе дэманструе здольнасць мадэлі разважаць у рэальных умовах, а не толькі ў абмежаваных гульнямі асяроддзях, як шахматы ці го. Ён адзначыў, што падобныя поспехі могуць адкрыць новыя магчымасці ў распрацоўцы лекаў, чыпаў і навуковых даследаваннях.

Эксперты ўспрынялі заяву з асцярожным аптымізмам. Прафесар Сцюарт Расэл з Каліфарнійскага ўніверсітэта ў Берклі адзначыў, што «заявы аб пераломнай эпосе могуць быць перабольшаны», аднак прызнаў, што паспяховае вырашэнне задач ICPC паказвае на рух да стварэння ШІ, здольнага генераваць сапраўды якасны і дакладны код.

Разам з тым Google не раскрыла, якія менавіта рэсурсы спатрэбіліся для працы мадэлі, удакладніўшы толькі, што яны значна перавышаюць даступныя падпісчыкам сэрвісу Google AI Ultra.