Міністр замежных спраў абвінаваціў Захад ва ўцечцы мазгоў і неакаланіялізме ў сферы ШІ

Сярод іншага ён заявіў, што былыя каланіяльныя краіны выкарыстоўваюць неакаланіяльныя метады ў палітыцы, эканоміцы, гуманітарнай, культурнай і іншых сферах, каб аднавіць сваё дамінаванне ў свеце. І, маўляў, менавіта з-за іх таленавітыя людзі кідаюць радзіму.

«У культурнай сферы неакаланіялізм часцей за ўсё асацыюецца з „уцечкай мазгоў“ — адтокам талентаў і спецыялістаў на Захад, дзе яны становяцца ахвярамі фальшывай палітыкі мультыкультуралізму, якая на справе прыводзіць да гвалту і дэградацыі», — сказаў чыноўнік.

«Трывожыць і тое, што неакаланіяльныя падыходы ўсё актыўней праяўляюцца і ў новых актуальных сферах, <…> такіх як штучны інтэлект ці змена клімату», — працягнуў Рыжанкоў. Ён дадаў, што экс-каланізатары спрабуюць навязаць свету сваю «эгаістычную і палітызаваную павестку» ў гэтых пытаннях.

Ён лічыць, што краіны арганізацыі павінны ўзмацніць узаемадзеянне, каб менш залежаць ад Захаду, таму што ў іх ёсць для гэтага ўсё неабходнае, уключаючы грошы, людзей, тэхналогіі і рынкі.

«Беларусь, напрыклад, захаваўшая і развіўшая тэхналагічны патэнцыял пасля распаду Савецкага Саюза, гатовая дзяліцца сваімі напрацоўкамі ў прамысловасці, сельскай гаспадарцы, будаўніцтве і ІТ-сферы», — аб’явіў міністр. Ён заключыў тым, што толькі разам краіны руху змогуць пабудаваць «новы, справядлівы і мірны свет».