Google паказала АІ-інструмент для напісання кода — канкурэнта GitHub Copilot

Кампанія ўжо мела падобны інструмент пад назвай Duet AI, ён выйшаў ва ўсеагульны доступ пры канцы 2023 года. Ён быў перайменаваны ў Code Assist і значна абноўлены, а ў яго аснове замест Codey цяпер ляжыць мадэль Gemini.

Code Assist будзе даступны ў выглядзе плагінаў для папулярных рэдактараў кода, такіх як VS Code і JetBrains. Ён з’яўляецца прамым канкурэнтам Copilot Enterprise ад GitHub.

Code Assist атрымаў падтрымку Gemini 1.5 Pro з велізарным кантэксным акном у мільён токенаў. Гэта дазваляе скарміць інструменту Google значна больш кантэксту ў параўнанні з аналагамі і забяспечвае больш карэктныя падказкі кода, а таксама ён лепш здольны «абдумваць» і відазмяняць буйныя фрагменты кода.

Як і GitHub Enterprise, Code Assist можна кастамізаваць пад унутраную кодавую базу кампаніі, што таксама спрыяе паляпшэнню якасці падказак. Пакуль гэты функцыянал знаходзіцца ў рэжыме прэв’ю.

Яшчэ адное адрозненне Code Assist у тым, што ён падтрымлівае код у розных рэпазіторыях, напрыклад, GitLab, GitHub і BitBucket, а таксама праекты, размеркаваныя па некалькіх платформах.