Google выставіла дыстанцыйным супрацоўнікам ультыматум: або працуеце ў офісе, або звальняецеся

Паводле CNBC, Google пачала патрабаваць ад супрацоўнікаў на аддаленцы вярнуцца ў офіс, калі яны хочуць захаваць свае працоўныя месцы і пазбегнуць больш шырокага скарачэння выдаткаў. Некалькі падраздзяленняў Google паведамілі работнікам, што іх пасады могуць быць скасаваныя, калі яны не пачнуць наведваць бліжэйшы офіс па гібрыдным графіку — мінімум тры дні на тыдзень. Некаторыя з гэтых супрацоўнікаў раней атрымалі адабрэнне на дыстанцыйную працу, высветліла выданне з унутраных дакументаў.

Напрыклад, супрацоўнікам падраздзялення Google Technical Services прапанавалі перайсці на гібрыдны офісны графік або прыняць добраахвотны выходны пакет. Аддаленым супрацоўнікам гэтага падраздзялення прапануецца аднаразовая кампенсацыя выдаткаў на пераезд у межах 50 міль ад офіса. Супрацоўнікі аддзела кадраў (People Operations), якія жывуць у межах 50 міль ад офіса, павінны перайсці на гібрыдны графік ужо да канца гэтага месяца, інакш іх пасады будуць скасаваныя.

Google і шматлікія іншыя тэхналагічныя кампаніі імкнуцца скараціць выдаткі і адначасова інвеставаць значныя сродкі ў штучны інтэлект, што патрабуе вялікіх выдаткаў на інфраструктуру і тэхнічныя кадры. Пасля масавых звальненняў у пачатку 2023 года Google правяла кропкавыя скарачэнні ў розных камандах. На канец мінулага года ў Google працавала каля 183 000 супрацоўнікаў, што менш  прыблізна на 10 000, чым годам раней.

Сузаснавальнік Google Сяргей Брын у лютым заявіў супрацоўнікам, якія займаюцца штучным інтэлектам, што яны павінны знаходзіцца ў офісе кожны працоўны дзень, прычым 60 гадзін на тыдзень з’яўляюцца «аптымальным паказчыкам прадукцыйнасці», паводле ліста, атрыманага CNBC. Брын адзначыў, што кампанія павінна «фарсаваць» намаганні, каб не адстаць ад канкурэнтаў у галіне ШІ, якая «неверагодна паскорылася».