Google: Rust-распрацоўшчыкі ўдвая прадуктыўнейшыя за распрацоўшчыкаў на C++

У прыватнасці, Бергстрам апісваў вопыт міграцыі праектаў Google, напісаных на Go або C++, на Rust. Калі яшчэ некалькі гадоў таму сярод распрацоўшчыкаў былі сумневы наконт надзейнасці і бяспекі апошняга, то цяпер нават амерыканскія ўлады заклікаюць выбіраць яго ў тым ліку за бяспеку працы з памяццю і тое, што ён дазваляе пазбегнуць крытычных уразлівасцяў.

Так, пасля перапісвання сістэм з Go на Rust выявілася, што на гэта патрабуецца прыкладна такая ж па памеры каманда і прыкладна столькі ж часу. То-бок не толькі няма страт прадуктыўнасці, але і ёсць пэўныя плюсы, напрыклад, меншы расход памяці і ніжэйшы паказчык дэфектаў у сэрвісах, партаваных з Go на Rust.

Але яшчэ больш была прыкметная розніца пры пераходзе на Rust з С++. «У кожным выпадку мы назіралі больш як двухразовае зніжэнне колькасці намаганняў, неабходных як для распрацоўкі сэрвісаў на Rust, так і для іх падтрымкі і абнаўлення. І гэта сапраўды важны момант для нас, паколькі код на С++ абыходзіцца вельмі дорага. Гэта велізарныя каманды. Гэта вялікі аб’ём працы. Гэта вялікія рызыкі», — адзначыў Бергстрам.

Ён дадаў, што цяпер выконваецца аналагічная міграцыя праектаў з Java на Kotlin, і ў абодвух выпадках час на перанавучанне распрацоўшчыкаў патрабуецца аднолькавы. Праз два месяцы прыкладна траціна распрацоўшчыкаў кажа, што дасягнула той жа прадуктыўнасці на новай мове, якая была на старой. А праз чатыры месяцы, згодна з ананімнымі ўнутранымы апытаннямі, доля такіх распрацоўшчыкаў узрастае да паловы.

Крыху больш за палову распрацоўшчыкаў ў камандзе Бергстрама лічаць, што код на Rust прасцей правяраць. Яшчэ адзін важны параметр — упэўненасць распрацоўшчыкаў ў правільнасці правяранага кода на Rust у параўнанні з кодам на іншых мовах: яна, паводле апытання, дасягае 85%. Бергстрам кажа, што ніколі не бачыў такіх высокіх паказчыкаў.

У 2022 годзе на карысць Rust выказваўся тэхнічны дырэктар Microsoft Azure Марк Русіновіч. Таксама адмаўляцца на карысць гэтай мовы ад С++ заклікала Агенцтва нацыянальнай бяспекі, а нядаўна — Белы дом.