Google звольніла падрадчыкаў, якія адказваюць за падтрымку YouTube. Яны хацелі аб'яднацца ў прафсаюз

Звольненыя падрадчыкі займаліся суправаджэннем YouTube TV і акаўнтаў YouTube у сацсетках. Большасць з іх базавалася ў тэхаскім Осціне. Працаўнікі Cognizant сталі даведвацца пра скарачэнні на пачатку мая, тэрміны заканчэння працы вар'іруюцца ад 31 мая да канца ліпеня. Колькі працаўнікоў кампаніі пазбавяцца яе, невядома. У Accenture, паводле слоў крыніц выдання, іхняя колькасць у дыяпазоне 120-150 чалавек.

Незадоўга да звальнення працаўнікі Cognizant, якія падтрымлівалі YouTube Music, прагаласавалі за стварэнне прафсаюза, іх інтарэсы будзе адстойваць Alphabet Workers Union — структура прафсаюза працаўнікоў тэлекамунікацыйнай галіны Communications Workers of America. Нацыянальнае ўпраўленне па працоўных адносінах ЗША зацвердзіла галасаванне 5 мая. Каманду YouTube Music скарачэнні не закранулі.

Супрацоўнікі Cognizant, якія падтрымлівалі YouTube TV, таксама праводзілі перамовы па стварэнні свайго прафсаюза, яны знаходзіліся на ранняй стадыі.

Google пацвердзіла журналістам Insider звальненне падрадчыкаў, але абвергла, што гэта звязана з іх прафсаюзнай актыўнасцю. Прадстаўнікі кампаніі растлумачылі, што яна спрабуе падвысіць эфектыўнасць сваіх выдаткаў на аплату падрадчыкаў і зэканоміць, дзе гэта магчыма, а таксама што праца ў гэтым кірунку вядзецца ў рамках усёй Alphabet ужо даўжэй за год і ахоплівае дзясяткі буйных падрадчыкаў у ЗША і па-за іх межамі.

У Cognizant таксама пацвердзілі завяршэнне кантрактаў на падтрымку YouTube TV. Працаўнікоў адправяць на бэнч. У іх будзе пяць аплачваных тыдняў, каб прайсці перападрыхтоўку і знайсці новую працу ў кампаніі. У адваротным выпадку з імі развітаюцца. У Accenture толькі сказалі, што перыядычна карэктуюць колькасць працаўнікоў на праектах кліентаў у адпаведнасці з іх запатрабаваннямі, а таксама аказваюць падтрымку працаўнікам у пераходны перыяд.