Google выпусціла мадэль, якая «разважае» — канкурэнта OpenAI
Кампанія анансавала новую эксперыментальную мадэль — Gemini 2.0 Flash Thinking. Гэтая нейрасетка, закліканая канкураваць з аналагічнай мадэллю O1 ад OpenAI, не толькі вырашае складаныя задачы, але і «тлумачыць» ход сваіх разваг.
Галоўны навуковы супрацоўнік Google DeepMind Джэф Дзін адзначыў, што мадэль навучаная «разважаць», разбіваючы задачы на этапы, што дапамагае дасягаць дакладнейшых вынікаў. Напрыклад, Gemini 2.0 Flash Thinking можа вырашаць складаныя задачы па фізіцы, пакрокава тлумачачы свае высновы. Навінка даступная на платформе AI Studio
Мадэль працуе на базе абноўленай тэхналогіі, якая забяспечвае высокую хуткасць апрацоўкі даных. У адным з тэстаў нейрасетка паспяхова справілася з задачай, якая спалучае тэкставыя і візуальныя элементы, прадэманстраваўшы здольнасць да мультымадальнага аналізу.
Аднак у мадэлі ёсць недахопы. Некаторыя тэсты паказалі, што мадэль можа памыляцца ў простых задачах, такіх як падлік літар у словах. Таксама мадэлі, якія разважаюць, часта займаюць больш часу — звычайна ад секунд да некалькіх хвілін даўжэй — каб знайсці рашэнні. Нягледзячы на гэта, Google лічыць, што Gemini 2.0 Flash Thinking — гэта першы крок да стварэння магутнейшых і надзейнейшых АІ-сістэм.
Читать на dev.by