Grok цяпер умее рэдагаваць код і запамінаць папярэднія размовы

Новая функцыя Grok Studio — гэта знаёмы карыстальнікам іншых чат-ботаў рэжым «палатна», у якім карыстальнікі могуць сумесна з чат-ботам працаваць над стварэннем дакументаў, кода, справаздач і нават браўзерных гульняў. Grok адкрывае згенераваны кантэнт у асобным акне, што «забяспечвае зручнае ўзаемадзеянне і рэдагаванне».

У рэжыме «палатна» таксама ёсць магчымасць папярэдняга прагляду HTML-фрагментаў і запуску кода на розных мовах праграмавання, уключаючы Python, C++ і JavaScript. Аналагічныя функцыі ўжо існуюць у ChatGPT (Canvas, з’явіўся ў кастрычніку 2024 года) і ў Anthropic (Artifacts для Claude).

Яшчэ адным важным новаўвядзеннем стала інтэграцыя Grok з воблачным сховішчам Google Drive. Цяпер карыстальнікі могуць далучаць да запытаў Grok файлы непасрэдна са свайго акаўнта Google Drive, уключаючы тэкставыя дакументы, электронныя табліцы і прэзентацыі.

Таксама xAI прадставіла функцыю памяці, якая дазволіць чат-боту запамінаць дэталі папярэдніх размоў з карыстальнікам і ўлічваць яго перавагі. Дзякуючы гэтай магчымасці адказы Grok стануць больш персаналізаванымі, бо сістэма зможа абапірацца на назапашаны досвед зносін з канкрэтным карыстальнікам. xAI адзначае, што «успаміны» з’яўляюцца празрыстымі: карыстальнікі змогуць бачыць, што менавіта запомніў Grok, і выбіраць, якую інфармацыю «забыць».

Аналагічныя функцыі доўгатэрміновай памяці ўжо рэалізаваны ў ChatGPT і Google Gemini, прычым OpenAI нядаўна ўдасканаліла сваю сістэму памяці, дазволіўшы ёй улічваць гісторыю ўсіх перапісак з карыстальнікам. Функцыя памяці ў Grok даступная ў бэта-версіі на ўласным сайце чат-бота і ў аплікацыях для Android і iOS, аднак карыстальнікі з Еўрапейскага Саюза і Вялікабрытаніі пакуль не змогуць ёю скарыстацца.