Х катастрафічна губляе аўдыторыю пад кіраўніцтвам Маска

У лютым мабільная праграма Х налічвала 27 млн штодзённых актыўных карыстальнікаў (DAU) у ЗША. Гэта на 18% менш, чым годам раней. Ад лістапада 2022 года — першага поўнага месяца, калі Х стала належаць Маску, — карыстальніцкая база Х у ЗША альбо заставалася нерухомай, альбо падала. Агульнае падзенне за гэты час склала 23%.

У глабальным маштабе ўсё таксама дрэнна. DAU мабільнай праграмы Х у лютым упала да 174 млн — мінус 15% год да года. Агульнасусветная карыстальніцкая база Х ад моманту ўгоды прадэманстравала невялікі рост толькі ў адным месяцы — у кастрычніку.

У іншых сацсетак глабальная аўдыторыя за той жа перыяд злёгку павялічылася: у Snapchat — на 8,8%, у Instagram — на 5,3%, у Facebook — на 1,5%, у TikTok — на 0,5%. Калі разглядаць толькі ЗША, то ўсе пяць праграм сышлі ў мінус, але значна менш, чым Х.

Прычына падзення аўдыторыі мабільнай праграмы Х можа быць звязаная з расчараваннем карыстальнікаў у кантэнце, тэхнічнымі праблемамі платформы, а таксама ростам папулярнасці платформаў, сканцэнтраваных на ўсё больш папулярным фармаце кароткіх відэа — Instagram і TikTok. Частка аўдыторыі можа перацякаць у Threads — аналаг Х ад Meta.

Акрамя таго, ад сацсеткі сталі адварочвацца рэкламадаўцы. Раней Маск публічна паслаў іх «к чорту», толькі трохі грубей. У Sensor Tower кажуць, што 75 з 100 топавых амерыканскіх рэкламадаўцаў платформы знізілі выдаткі на рэкламу тут з кастрычніка 2022 года.

Пры гэтым штомесячная аўдыторыя Х, паводле яе ж даных, складае 550 млн чалавек — на 1,5 больш, чым у мінулым ліпені. Колькасць спамповак Х у лютым у ЗША, паводле даных Apptopia, дасягнула 2,9 млн разоў. Гэта на 14% больш год да года, але ўсё роўна менш за тыя 3,7 млн, якія праграма набрала ў кастрычніку 2022 года.