Николай Чикишев 15 снежня 2022, 16:32

«Хабл» сфатаграфаваў сцяну з «касмічнага дыму». Там хаваюцца зародкі зорак і планет

Касмічная абсерваторыя зрабіла здымак цэнтральнай вобласці рассеянай скупнасці NGC 6530, якая выглядае як сцяна дыму.

Паводле даных навукоўцаў, у такіх аблоках малекулярнага міжзоркавага газу і пылу зараджаюцца зоркі, а вакол іх — планеты. У гэтых скупнасцях знаходзяцца прапліды, або протапланетныя дыскі. Гэтыя зародкі зорак і планет раней выяўлялі часцей за ўсё ў адным рэгіёне — у блізкай туманнасці Арыёна.

Вобласць рассеянай скупнасці NGC 6530 — адная з альтэрнатыўных абласцей, дзе можа быць мноства протапланетных дыскаў вакол маладых зорак. Назіранні «Хабла» будуць дапоўненыя і пашыраныя назіраннямі «Уэба», на борце якога знаходзяцца больш адчувальныя інфрачырвоныя камеры.