Хакер з Нідэрландаў захапіў персанальныя даныя амаль усіх аўстрыйцаў

Даныя — у тым ліку поўныя імёны, пол, адрасы і даты нараджэння аўстрыйцаў — з’явіліся на адным з інтэрнэт-форумаў у маі 2020 года. У ходзе расследавання была пацверджаная сапраўднасць гэтых даных. База ўтрымлівала інфармацыю пра прыкладна 9 млн чалавек. Насельніцтва Аўстрыі, паводле апошніх звестак, складае каля 9,1 млн.

Паводле слоў мясцовай паліцыі, хакер спрабаваў прадаць аналагічныя датасэты па Італіі, Нідэрландах і Калумбіі.

«Паколькі гэтыя даныя былі ў вольным доступе ў інтэрнэце, можна з вялікай верагоднасцю выказаць здагадку, што гэтыя рэгістрацыйныя даныя цалкам або часткова і незваротна знаходзяцца ў руках злачынцаў», — адзначылі ў паліцыі. Там дадалі, што даныя меркавана былі прададзеныя нявызначаным асобам.

25-гадовы падазраваны быў арыштаваны ў кватэры ў Амстэрдаме, у дачыненні да яго праводзяць расследаванне ўлады Нідэрландаў. Пра інцыдэнт не паведамлялі, каб не перашкодзіць працэсу.