Аддзел навін 17 лістапада 2022, 11:20

ІТ-кампаніі бралі ўдзел у дзяржконкурсе. Цяпер ім няможна сыходзіць з РБ

У спісе юрыдычных асоб з акцыянерамі з «недружалюбных краін» ужо пяць ІТ-кампаній — ім забаронена прадаваць долі і рэарганізоўвацца. Акрамя EPAM і Wargaming у спіс трапілі адразу тры ІТ-кампаніі з Гомеля. Дзве з іх малавядомыя — затое перамагалі ў дзяржаўным конкурсе «Прадпрымальнік года».

3 каментарыя

ІТ-кампаніі бралі ўдзел у дзяржконкурсе. Цяпер ім няможна сыходзіць з РБ

У спісе юрыдычных асоб з акцыянерамі з «недружалюбных краін» ужо пяць ІТ-кампаній — ім забаронена прадаваць долі і рэарганізоўвацца. Акрамя EPAM і Wargaming у спіс трапілі адразу тры ІТ-кампаніі з Гомеля. Дзве з іх малавядомыя — затое перамагалі ў дзяржаўным конкурсе «Прадпрымальнік года».

Перадгісторыя

1 ліпеня Саўмін Беларусі апублікаваў спіс кампаній з замежнымі акцыянерамі з дзяржаў, якія здзяйсняюць «недружалюбныя дзеянні ў дачыненні да беларускіх юрыдычных і (або) фізічных асоб». Замежным акцыянерам забаранілі адчужаць долі (акцыі) у кампаніях са спісу.

А якія дзяржавы лічацца ў Беларусі недружалюбнымі?

Такіх дзяржаў некалькі дзясяткаў: усе краіны-сябры ЕС, ЗША, Канада, Чарнагорыя, Албанія і г. д.

У першапачатковы спіс кампаній з замежнымі ўладальнікамі трапілі чатыры ІТ-кампаніі:

EPAM
Wargaming
IBA Gomel Park (Гомельскі філіял групы кампаній IBA)
ItSupportMe (таксама з Гомеля)

Мы ўжо пісалі, што дзве апошнія кампаніі гралі прыкметную ролю ў дзелавым жыцці Гомеля. Напрыклад, там праходзілі размеркаванне студэнты гомельскіх універсітэтаў.

У кастрычніку з’явіліся новыя забароны (тут мы разабралі, ці стала кампаніям яшчэ горш). Акцыянерам «з недружалюбных дзяржаў» забаранілі рэарганізацыю кампаній і выхад з іх. А сам спіс папоўніўся дзвюма новымі юрасобамі.

У тым ліку яшчэ адной ІТ-кампаніяй з Гомеля — ТАА «Мбайсікл» (Mbicycle).

Софт для НБА і паспяховы старт

У 2017 годзе на гомельскай тэлевізіі паказалі сюжэт пра рэзідэнта мясцовага тэхнапарка. «Апошнім часам Беларусь прызнаная флагманам ІТ-тэхналогій» — такімі словамі пачынаўся сюжэт пяцігадовай даўніны. CEO Mbicycle Ігар Нікалаеў расказваў тэлегледачам, што кампанія распрацоўвае праграмнае забеспячэнне для амерыканскай баскетбольнай лігі (НБА) — софт для датчыкаў, што мацуюцца на целы гульцоў або мяч і збіраюць статыстыку.

Замежны ўладальнік Mbicycle, праз якога кампанія і трапіла ў спіс Саўміна — кіпрская Niltasoft.

Што яшчэ вядома пра Niltasoft

Niltasoft звязаная яшчэ з адной ІТ-кампаніяй з офісам у Беларусі — Softline (або Noventiq — кампанія нядаўна рэарганізавала і перайменавала еўрапейскі бізнэс). Паводле даных кіпрскага рэестра, Niltasoft валодае акцыямі дацкага філіяла Softline.

Цяпер каманда Mbicycle працуе з Польшчы, Грузіі і Казахстана. Офіс У Гомелі на сайце і ў сацсетках кампаніі не згадваецца.

Гомельская тэлевізія здымала сюжэт і пра іншага фігуранта «недружалюбнага» спісу — кампанію ItSupportMe.

Аб’ядноўвае Mbicycle і ItSupportMe яшчэ і тое, што абедзве кампаніі двойчы станавіліся лаўрэатамі дзяржаўнага конкурсу «Прадпрымальнік года».

ItSupportMe — у 2016 (намінацыя «Інавацыйна актыўны бізнэс») і 2017 («Эфектыўны бізнэс у сферы паслуг») гадах.
Mbicycle — у 2020 («Паспяховы старт») і 2021 («Эфектыўны бізнэс у сферы паслуг») гадах.

Заяўку на ўдзел у конкурсе кампаніі накіроўваюць у «гарвыканкамы, райвыканкамы, адміністрацыі раёнаў г. Мінска».

Магчыма, рэгіянальныя чыноўнікі маглі ўлічваць вынікі конкурсу пры складанні спісаў кампаній з замежнымі акцыянерамі. Акрамя згаданых ІТ-кампаній у спісе ёсць, напрыклад, вытворца аўтазапчастак з Віцебскай вобласці «Манулі Гідраўлікс» — Прадпрымальнік года-2021.

Гомельскі райкам называе тры галоўныя прычыны паўдзельнічаць у конкурсе «Прадпрымальнік года»:

Атрымаць заслужанае прызнанне ўрада і дзелавой супольнасці.
Акрамя прэміі і прызоў, атрымаць свабодны доступ да ўнікальных майстар-класаў, семінараў і кансалтынгавых паслуг ад прызнаных на міжнародным узроўні экспертаў.
Яшчэ раз заявіць пра сябе і свой бізнэс з дапамогай сродкаў масавай інфармацыі, стаць натхняльнікам і прыкладам для бізнэсоўцаў-пачаткоўцаў.

За перамогу ў сваёй намінацыі Прадпрымальнік года атрымлівае дыплом і грашовую прэмію ў памеры 50 базавых велічынь.

У 2022 годзе гэта 1600 беларускіх рублёў.