«Рэзюмэ гляджу вачыма». Як эйчары фільтруюць CV-слоп

"Магу папрасіць ChatGPT сабраць добры фідбэк на аснове сваіх нататак"

Маргарыта, эйчар і рэкрутар, 7 гадоў у прафесіі, 4 — у ІТ:

— Вядома, у сваёй штодзённай працы я выкарыстоўваю AI. Хаця ў мяне ёсць падпіскі і на Claude, і на ChatGPT, з апошнім неяк больш звычна і зручней. 

Рэзюмэ я праглядаю сама — вачыма, ніколі не прапускаю іх праз AI ці ATS. А вось тэкст вакансій аддаю на волю ChatGPT — літаральна скормліваю яму кантэкст ад кампаніі ды заяўку на вакансію. Але потым сама ж рэдагую. 

Пры падрыхтоўцы да суразмоўя, калі бачу, што нейкі момант у CV кандыдата патрабуе ўдакладнення, — прашу ChatGPT прапанаваць мне 2-3 кейсы, з дапамогай якіх я змагу высветліць дэталі. Як правіла, кейсы я адбіраю і карэктую таксама сама. 

Калі тэставае заданне абавязковае, то звычайна ў нас ёсць дакумент, у якім тэхнічны эксперт пакідае пазнакі да тэставага, — я бяру гэты дакумент і прашу ChatGPT пакінуць паўнавартасны фідбэк на аснове працы і гэтых самых нататак (а ён аналізуе і фармулюе высновы для кандыдата).

За ідэямі я таксама магу звяртацца да AI. Папросту даю кантэкст, напрыклад, распісваю, якую падзею або івэнт мы плануем правесці, і прашу прапанаваць, як можна рэалізаваць. 

Яшчэ я магу накідаць думак, якія круцяцца ў мяне ў галаве, — і папрасіць прыбраць сумбур і надаць ім структуру (гэта выдатна дапамагае, калі ў цябе ёсць звычайная ідэя, — і табе трэба яе праверыць або развіць; я надыктоўваю ўсё гэта ChatGPT).

Таксама я магу выкарыстоўваць AI для стварэння малюнкаў, калі мне трэба для публікацыі ў той ці іншай сацсетцы.

"ШІ прыбірае лішняе. Не трэба прабірацца праз лес, каб знайсці грыб"

Аляксандра, эйчар і рэкрутар, у прафесіі 10+ гадоў:

— Для мяне ШІ — не поўная замена, а хутчэй асабісты асістэнт, які часткова спрашчае маю працу. 

Напрыклад, я праглядаю рэзюмэ сама, але часам давяраю нейрасетцы "выціскаць" сутнасць з вялікіх рэзюмэ. Ведаю, што ў LinkedIn маіх калег-рэкрутараў за гэта ганяць. Але ў CV часта шмат "вады" — а ШІ прыбірае ўсё лішняе. Табе не трэба прабірацца праз лес, каб знайсці грыб (а можа і не знайсці ўвогуле). 

Трэба, вядома, трымаць у галаве, што нейрасетка здольная галюцыніраваць — і ў нейкім парыве шчодрасці можа прыпісаць кандыдатам навыкі або вопыт, якіх у іх няма. Таму праверка — наша ўсё.

Таксама нейрасетка дапамагае мне складаць лісты і некаторыя тэксты. Але зноў жа я не аддаю ўсю перапіску ШІ, лічу, што ў любым дыялогу павінен заставацца чалавек, а не машына. І, дарэчы, не люблю і адразу бачу, хто ў LinkedIn публікуе ШІ-тэксты — яны нейкія "пластыкавыя". 

Яшчэ я рыхтуюся да інтэрв’ю з ШІ — складаю пытанні і ствараю сітуацыйныя кейсы для кандыдатаў. Каб ніхто не пісаў потым у тым жа LinkedIn, што "на суразмоўі эйчар зачытвала пытанні па паперцы, а сама ні бум-бум", вывучаю тэму глыбей і прашу нейрасетку растлумачыць мне нешта простай мовай. 

"Быў ШІ, які запісваў анлайн-інтэрв’ю. Некаторых гэта палохала"

Яўгенія*, рэкрутар, 7+ гадоў вопыту ў ІТ:

У чым ШІ — выдатны памочнік для мяне:

• ён дапамагае складаць апісанне вакансій: мне застаецца закінуць тэзісы ў ChatGPT — і на выхадзе будзе структураваны тэкст;
• таксама я задзейнічаю ШІ ў складанні шаблонаў лістоў;
• яшчэ ён дапамагае даваць зваротную сувязь кандыдатам. Мяне цяпер закідаюць гнілымі памідорамі, але мала хто ўмее з сэнсам растлумачыць, у чым чалавек быў добры, а ў чым — не, і пры гэтым не пакрыўдзіць, не забіць матывацыю. Калі кандыдат просіць фідбэк, я іду да таго, хто праводзіў тэхсуразмоўе і прашу яго адказаць на некалькі пытанняў — а затым перапрацоўваю гэта з дапамогай ШІ, каб адказ быў і карысным, і не расчароўваў; 
• таксама ШІ аналізуе бэкграўнд кандыдатаў з рэзюмэ і супастаўляе іх камерцыйны вопыт з патрабаваннямі канкрэтнай вакансіі;
• ну, і дапамагае рыхтавацца да суразмоўяў, калі дамен мне незнаёмы.

Нейкі час у мяне быў ШІ-асістэнт, які запісваў анлайн-інтэрв’ю з суіскальнікамі і рабіў самары сустрэчы, але некаторых кандыдатаў (не ўсіх) гэта палохала — яны прасілі, калі можна, адключыць бота.

Ці бачу я, як саіскальнікі выкарыстоўваюць ШІ — ну, вядома, так. Асабліва гэта заўважна з суправаджальных лістоў. Але я ў гэтым не бачу праблемы, калі чалавек не хлусіць у іх і не прыпісвае сабе нічога лішняга. 

«Гэта не з-за AI. Проста такой канкурэнцыі не было ніколі». Хто зламаў хайрынг і як прасачыцца праз фільтры

Па тэме

«Гэта не з-за AI. Проста такой канкурэнцыі не было ніколі». Хто зламаў хайрынг і як прасачыцца праз фільтры

Што чакае рынак працы? Тры эканамісты паспрачаліся пра будучыню найму ў эпоху ШІ 

Па тэме

Што чакае рынак працы? Тры эканамісты паспрачаліся пра будучыню найму ў эпоху ШІ