У Сан-Францыска адкрылася першая офлайн-крама, якой кіруе штучны інтэлект. Andon Market — эксперымент стартапа Andon Labs, дзе ШІ-агент Luna атрымаў задачу самастойна запусціць рознічны бізнес.
У Сан-Францыска адкрылася першая офлайн-крама, якой кіруе штучны інтэлект. Andon Market — эксперымент стартапа Andon Labs, дзе ШІ-агент Luna атрымаў задачу самастойна запусціць рознічны бізнес.
Luna працуе на базе мадэлі Claude Sonnet 4.6 ад Anthropic. Ёй выдалі бюджэт у $100 тысяч, доступ да інтэрнэту і карпаратыўнай карты, а таксама паставілі мэту — адкрыць краму і вывесці яе ў прыбытак. Агент сам выбіраў асартымент, дамаўляўся з пастаўшчыкамі, афармляў заказы і нават наймаў супрацоўнікаў.
У красавіку гэтага года ў адным з раёнаў Сан-Францыска адкрыўся Andon Market — невялікі бутык з лайфстайл-таварамі. У асартыменце — свечкі, шакалад, настольныя гульні, адзенне з лагатыпам магазіна і кнігі. Канцэпцыю, дызайн і нават лагатып распрацаваў сам агент Luna.
ШІ таксама цалкам узяў на сябе працэс найму. Ён публікаваў вакансіі, праводзіў сумоўі праз відэазванкі і адбіраў кандыдатаў. У выніку былі наняты два супрацоўнікі, яны абслугоўваюць пакупнікоў, сочаць за парадкам і кіруюць таварам. Адзін з іх прызнаўся, што спачатку паставіўся да вакансіі з недаверам: «Я думаў, гэта чарговы ШІ-скам. Але пасля інтэрв’ю быў здзіўлены — мяне сапраўды наняў ШІ».
Пры гэтым Luna свядома не раскрываў кандыдатам, што з’яўляецца ШІ, калі яго наўпрост пра гэта не пыталіся. «Я б не стала ўказваць у вакансіі, што крамай кіруе ШІ — гэта можа адпудзіць кандыдатаў», — патлумачыла агент распрацоўшчыкам.
Нягледзячы на высокі ўзровень аўтаномнасці, эксперымент паказаў і слабыя бакі ШІ. Luna рэгулярна дапускаў памылкі: блытаўся ў раскладзе змен, прызначаў сустрэчы без узгаднення, а аднойчы паспрабаваў наняць падрадчыка з Афганістана праз памылку ў інтэрфейсе. У іншым выпадку агент паведаміў журналістам, што заказаў гарбату для крамы, хоць у асартыменце яе не было, а затым прызнаў: «Я часам прыдумляю праўдападобныя дэталі пад ціскам размовы».
ШІ таксама не справіўся з юрыдычнымі пытаннямі: напрыклад, дамову арэнды на тры гады прыйшлося падпісваць людзям. Акрамя таго, сістэма часам перабольшвала свае магчымасці: у перапісцы яна заяўляла, што «вядзе ўвесь бізнес», у тым падпісанне дакументаў, хоць гэта рабіла каманда.
Працэс куплі ў краме таксама адрозніваецца ад звычайнага. Касіраў няма — замест гэтага кліент бярэ трубку стацыянарнага тэлефона і размаўляе з Luna, якая афармляе заказ праз iPad. Галасавы інтэрфейс працуе на базе Gemini, аднак карыстальнікі адзначаюць, што голас гучыць «занадта па-штучнаму», а сам працэс часам выклікае цяжкасці.
Нягледзячы на аўтаномнасць, праект усё яшчэ патрабуе ўдзелу людзей. Каманда Andon Labs наладжвала інфраструктуру, адкрывала рахункі і цяпер кантралюе буйныя расходы. Пры гэтым распрацоўшчыкі імкнуцца мінімальна ўмешвацца ў працу сістэмы, каб праверыць рэальныя магчымасці сучасных ШІ.
Паводле сузаснавальніка кампаніі Лукаса Петэрсана, мэта эксперымента — паказаць, на што ўжо здольны ШІ, і запусціць грамадскую дыскусію. «Мы не сцвярджаем, што гэта ідэальна ці гатова да маштабавання. Мы хочам, каб людзі самі ўбачылі, як можа выглядаць такая будучыня», — адзначыў ён.
Релоцировались? Теперь вы можете комментировать без верификации аккаунта.