Intel рызыкуе вылецець з індэкса Dow Jones праз моцнае падзенне каціровак

Такую магчымасць дапускаюць аналітыкі і інвестары. За бягучы год акцыі кампаніі абваліліся прыкладна на 60% — гэта найгоршая дынаміка ва ўсім рэйтынгу. На сённяшніх таргах каштоўныя паперы тэхнагіганта патаннелі на 7%.

Выгнанне з індэкса нанясе ўдар па ўжо і так пацярпелай рэпутацыі Intel. Яна не змагла атрымаць выгаду з буму АІ, а ў падраздзялення кантрактнай вытворчасці чыпаў, якое яна развівае ў надзеі пазмагацца з TSMC, растуць страты.

Каб прафінансаваць новы бізнэс, Intel прыпыніла выплату дывідэндаў і плануе звольніць 15% штату. Аднак некаторыя сябры праўлення лічаць, што гэтыя меры не дапамогуць.

Агульнасусветныя продажы паўправаднікоў у ліпені ўпалі больш чым на 11% у параўнанні з чэрвенем, а сам паказчык быў ніжэйшы за сярэднія значэнні за апошнія 5 і 10 гадоў.