ІТ-кампаніі з беларускімі каранямі занялі за год палову айцішных офісаў Вільні

Як адзначаюць у Colliers, 2022 год, нягледзячы на няпростую эканамічную сітуацыю (рост інфляцыі і цэн на энергарэсурсы), выявіўся адным з рэкордных паводле колькасці новых офісаў у Вільні. Усяго дадалося каля 111 тысяч кв. метраў якасных офісных плошчаў. За апошнія 10 гадоў больш прадукцыйным быў толькі 2020 год. Тады было ўведзена ў эксплуатацыю 113 тысяч кв. метраў офісаў.

Увод новых офісных плошчаў у Вільні

За 2022 год бізнэс арандаваў 108 тысяч кв. метраў офісных плошчаў. Гэта найвышэйшы паказчык за ўсе гады.

Найбуйнейшымі арандатарамі сталі кампаніі ІТ-сектара. За год яны знялі амаль 30 тысяч кв. метраў офісаў, або 28% ад агульнага аб’ёму. Гэта на 8% больш, ніж у 2021 годзе. 

А сярод ІТ-сектара найбуйнейшымі арандатарамі выявіліся кампаніі з беларускімі каранямі. Яны арандавалі каля 15 тысяч кв. метраў офісаў з 30 тысяч.

Размеркаванне здадзеных у арэнду офісаў паводле груп арандатараў

Найбуйнейшыя замежныя кампаніі-арандатары з ІТ з беларускімі каранямі — Wargaming, Flo, Melsoft, EPAM, EIS Group.

Зрэшты, сёлета попыт на офісы з боку айцішнікаў можа знізіцца. Як адзначаюць аналітыкі Colliers, большая частка ІТ-кампаній адкрылася ў Літве ў 2020–2021 гадах. Актыўны попыт на офісы прыйшоўся на 2022 год. Таму цяпер такога актыўнага пашырэння не адбываецца. Запыты на офісныя плошчы, як правіла, невялікія — 100-600 кв. метраў.

Асаблівых патрабаванняў да офісных памяшканняў з боку ІТ-кампаній з беларускімі каранямі няма. Гэта, як правіла, цэнтральнае месцазнаходжанне, якасная архітэктура і дызайн, наяўнасць парковачных месцаў (звычайна хочуць больш, чым можа даць арэндадаўца), змяшаная планіроўка (кабінеты і open space), пераважна з аздабленнем.

Пры гэтым шэраг дывелапераў гатовыя даць дадатковыя паслугі арандатарам: перамоўныя пакоі, агульныя кухні, зоны адпачынку, тэрасы і прылеглыя тэрыторыі. Кошт гэтых паслуг часам ужо ўключаны ў арэнду.

За мінулы год стаўкі нязначна выраслі. Офісы класа «А» прапаноўваюць у арэнду па 15-20 еўра за кв. метр без ПДВ і эксплуатацыі, класа «В» — па 10-14,5 еўра за кв. метр.

У Colliers прагназуюць, што сёлета стаўкі наўрад ці знізяцца, асабліва на якасныя офісы ў цэнтры горада, якіх не стае. Пра гэта сведчыць і вакантнасць. У прыватнасці, у офісах класа «А» яна даволі нізкая — каля 7% свабодных плошчаў.