ІТ-рэкрутары назвалі самых запатрабаваных супрацоўнікаў у ЗША — і неабходныя якасці

У венчурнай фірме Redpoint Ventures адзначаюць, што ШІ-кадры ў верхнім працэнтылі атрымліваюць шмат праглядаў профіляў і вельмі цікавыя оферы. Meta на мінулым тыдні набыла 49%-ную долю ў стартапе Scale AI за $15 млрд, каб уключыць у сваё кіраванне яго заснавальніка Аляксандра Ванга. Ён узначаліць новую ШІ-каманду па распрацоўцы звышінтэлекту, якую асабіста збірае Марк Цукерберг.

Пры гэтым пул кваліфікаваных кандыдатаў вельмі сціплы, адзначаюць у фірме Lunch, якая дапамагае тэхнакампаніям наймаць. Там адзначаюць, што наймальнікі часта аддаюць перавагу кандыдатам узроўню Ph.D. з шматгадовым досведам, але праблема ў тым, што гэтая сфера папулярная занадта мала часу і ў ёй яшчэ не паспела з’явіцца дастаткова спецыялістаў, каб задаволіць попыт.

Кашмар для працадаўцаў з аднаго боку — мара для тых, у каго ёсць патрэбныя навыкі, — з другога. А менавіта, для дата-сайентыстаў, якія з ледзь прыкметных ператварыліся ў найважнейшых спецыялістаў у кампаніях. Даследчыкаў забіраюць з універсітэцкіх лабараторый. Некаторыя дызайнеры з тэхнічнымі і кодынгавымі навыкамі даганяюць па заробках інжынераў.

Паводле слоў апытаных Business Insider рэкрутараў, якія займаюцца падборам ШІ-спецыялістаў для тэхнакампаній, самыя запатрабаваныя пазіцыі зараз — ШІ-інжынер, ML-інжынер, інжынер па распрацоўцы ШІ-агентаў, інжынер інфраструктуры, навуковец-даследчык, а таксама гібрыдная роля інжынера-даследчыка.

Рэкрутары з True Search адзначаюць, што для адной і той жа працы расквітнеў цэлы заапарк розных абазначэнняў, хаця OpenAI, Anthropic і іх канадскі канкурэнт Cohere аддаюць перавагу абазначаць іх як «тэхнічны персанал» (member of technical staff).

Складаней за ўсё знайсці даследчыкаў. Ідэальны кандыдат, паводле апісання рэкрутараў, мае ступень у машынным навучанні, статыстыцы ці матэматыцы, пераважна атрыманую ў топавых ВНУ накшталт MIT, Стэнфарда ці Каліфарнійскага ўніверсітэта ў Берклі. Прываблівасць падвышае наяўнасць некалькіх гадоў досведу ў ІТ-кампаніі. У SingleSprout кажуць, што на пазіцыях, звязаных з ужываннем ШІ, працадаўцаў больш цікавіць практычны досвед кандыдатаў, чым тое, што яны вывучалі.

Таксама рэкрутары ўсё больш кажуць пра важнасць софт-скілаў пры ацэнцы пашукоўцаў: асабліва на фоне папулярнасці вайб-кодынгу кампаніі пачынаюць разумець, што шмат тэхнічных навыкаў у той ці іншай ступені можна аўтаматызаваць. А таксама шукаюць менеджараў, якія дапамогуць адаптавацца ў асяроддзі, што змяняецца.

Кампаніі сталі надаваць такое ж значэнне эмацыйнаму інтэлекту, як і звычайнаму. Яны шукаюць кандыдатаў, якія здольныя знаходзіць кампрамісы і выбудоўваць эфектыўную камунікацыю паміж тэхнічнымі і бізнес-камандамі, а таксама здольныя слухаць.