ІТ-сектар страціў 13+ тысяч спецыялістаў. Пік звальненняў, відаць, пройдзены

У верасні з кампаній звольнілася на 49,5% больш спецыялістаў, чым у верасні мінулага года. Але ў параўнанні са жніўнем гэтага года звольненых аказалася на 14% менш, а ў параўнанні з ліпенем — на 25% менш.

Калі ў красавіку-ліпені кампаніі звальнялі на месяц больш за 3 тысячы чалавек, то ў жніўні-верасні ўжо менш за 2,7 тысячы. Пры захаванні такой дынамікі ў чацвёртым квартале колькасць звольненых можа ўпасці да 1,2-1,8 тысячы на месяц.

Зрэшты, «мабілізацыйныя» эфекты яшчэ ўбачым у статыстыцы наступных месяцаў.

Найманне спецыялістаў пасля невялікага росту ў жніўні і верасні вярнулася да звыклых лічбаў апошніх месяцаў. Усяго кампаніі ўзялі на працу 967 чалавек. У параўнанні з вераснем мінулага года найманне знізілася на 54%, у параўнанні са жніўнем гэтага года — на 7,5%.

Сумарна за 9 месяцаў кампаніі нанялі 10+ тысяч новых супрацоўнікаў — на 30% менш, чым за аналагічны перыяд мінулага года.

Звольнілася з ІТ-кампаній ад пачатку года больш за 23,4 тысячы спецыялістаў — амаль удвая больш, чым за такі ж перыяд 2021 года.

Чысты адток кадраў з ІТ-сектара за верасень склаў 1,3 тысячы спецыялістаў. Гэта мінімальная колькасць за апошнія паўгода. Сёлета толькі ў сакавіку адток быў ніжэйшы.

У цэлым за студзень-верасень чысты адток ІТ-спецыялістаў перавысіў 13 тысяч.