ІТ-сістэма чыгункі Сан-Францыска пабудаваная на дыскетах, знаходзіцца на мяжы калапсу, але не будзе мяняцца найбліжэйшым дзесяцігоддзем

Згаданая ІТ-сістэма забяспечвае працу аднаго з найважнейшых кампанентаў інфраструктуры сусветнага цэнтра тэхналогій і інавацый. Яна была запушчаная ў 1998 годзе ў эпоху, калі, паводле слоў дырэктара SFMTA, «у камп’ютарах не было цвёрдых дыскаў». У сваёй заяве ён прамахнуўся на дзясятак гадоў, паколькі камп’ютары з HDD-дыскамі былі шырока распаўсюджаныя нават у хатніх ПК ужо на пачатку 1990-х, а пры канцы дзесяцігоддзя свой росквіт перажывалі не дыскеты, а CD-дыскі.

Словы кіраўніка SFMTA пра перыяд стварэння сістэмы выклікалі пытанні наконт таго, на якіх менавіта дыскетах яна грунтуецца. У відэарэпартажы ABC7 News некалькі разоў прамільгнулі адносна сучасныя 3,5-цалёвыя дыскеты, але таксама было агучана, што ў сістэме патрабуецца штодня абнаўляць па тры 5-цалёвыя дыскеты. Верагодна, гэта была агаворка і гаворка наўрад ці ішла апра яшчэ старажытнейшыя 5,25-цалёвыя дыскеты 40-гадовай даўніны, якія выкарыстоўваліся ў 1980-х.

Тамлін між тым заявіў, што цяперашняя сістэма кіравання цягнікамі функцыянуе ўжо 26 гадоў замест планаваных 20-25 гадоў. Ён запэўніў, што сістэма дагэтуль спраўная, але папярэдзіў, што «з кожным годам рызыка дэградацыі даных на дыскетах узрастае, і ў нейкі момант адбудзецца катастрафічны збой».

На стварэнне і ўкараненне новай такой сістэмы сыдзе каля дзесяці гадоў і сотні мільёнаў долараў. Падрадчык пакуль не знойдзены, і распрацоўка яшчэ не пачатая, але чыноўнікі плануюць заказаць комплексную сістэму для цягнікоў і метро Сан-Францыска і найбліжэйшых раёнаў.