Bluesky накрыла хваля фэйкавых акаўнтаў. Каманду мадэратараў павялічылі ў 4 разы

Праблема падробленых акаўнтаў значна абвастрылася ў сувязі з ростам папулярнасці сацсеткі і прытокам знакамітасцяў і інфлюенсераў. Цяпер карыстальнікі Bluesky усё часцей сутыкаюцца з фэйкавымі акаўнтамі, якія выдаюць сябе за вядомых асоб. Праблему пагаршае адсутнасць сістэмы верыфікацыі, падобнай да той, што была ў Twitter.

Кампанія заявіла, што акаўнты, якія выдаюць сябе за профілі знакамітасцяў і прымяняюць хэндл-сквотынг (рэгістрацыю імёнаў карыстальнікаў, падобных да імёнаў вядомых людзей), будуць выдаляцца. Для парадыйных, фан-акаўнтаў і акаўнтаў, прысвечаных сатыры, будзе абавязковая выразная маркіроўка ў імені карыстальніка і біяграфіі, якая паказвае на неафіцыйны характар акаўнта.

Bluesky таксама забараняе «змену ідэнтычнасці»: стварэнне фэйкавага акаўнта з мэтай атрымання падпісчыкаў, а затым змяненне яго на іншы. Для барацьбы з фэйкавымі акаўнтамі Bluesky павялічыла сваю каманду мадэратараў у чатыры разы. Аднак кампанія прызнала, што праз вялікую колькасць новых карыстальнікаў усё яшчэ існуе чарга на разгляд скаргаў.

Bluesky плануе распрацаваць больш гнуткую сістэму, у якой не толькі Bluesky, але і іншыя праграмы або арганізацыі змогуць верыфікаваць акаўнты. Нядаўні аналіз паказаў, што амаль палова са ста самых папулярных акаўнтаў на Bluesky мае як мінімум адзін фэйкавы акаўнт. Толькі 16% з выяўленых падробленых профіляў мелі пазнаку «фэйкавы».

Платформа перажывае бурны рост аўдыторыі: неўзабаве пасля прэзідэнцкіх выбараў у ЗША на пачатку лістапада праграма пачала набіраць каля 100 тысяч карыстальнікаў на дзень. Эксперты звязваюць гэта з расчараваннем карыстальнікаў у сацсетцы X, уладальнік якой Ілан Маск падтрымлівае Дональда Трампа. 12 лістапада кампанія абвясціла, што за апошні тыдзень да яе далучыўся 1 мільён карыстальнікаў.