Як змяняўся прыбытак на супрацоўніка ў кампаніях накшталт Amazon і Meta, якія прагна наймалі і цяпер скарачаюць тысячамі
Ад пачатку 2022 года ў ІТ-сектары было звольнена больш за 300 тысяч чалавек. Кампаніі праводзяць шматтысячныя чысткі, каб знізіць выдаткі і стаць ашчаднейшымі і эфектыўнейшымі — так даюцца ў знакі наступствы неабдуманага наймання за некалькі гадоў пандэміі. Інвестары адзначаюць, што цяпер кампаніям трэба змяніць прыярытэты і клапаціцца не пра тое, хто больш наняў, а пра каэфіцыент эфектыўнасці, які выяўляецца ў даходзе на аднаго супрацоўніка.
Паказчык вылічваецца проста: гадавая выручка кампаніі дзеліцца на колькасць супрацоўнікаў. Чым больш, тым лепш — адваротнае кажа пра разадзьмутасць штату і нізкую прадукцыйнасць працы. Insider прааналізаваў звесткі за 2018–2022 гады па 7 тэхнагігантах. Графікі ніжэй наглядна дэманструюць, чаму паўстала неабходнасць масава звальняць і чаму камусьці — больш, ніж астатнім.
Як бачна, паводле тэмпаў наймання лідзіравалі Amazon і Meta, якія сумарна за два раўнды звальненняў — найбуйнейшых у ІТ — пазбавіліся 48 тысяч супрацоўнікаў.
Агрэсіўна наймаў і Twitter, у якога выручка на супрацоўніка за разгледжаны перыяд упала больш за ўсё. У цэлым гэты паказчык дэманструе рост у чатырох кампаній: Apple, Alphabet, Salesforce і Microsoft. Прычым у Apple, якая была сціплейшая за ўсіх, прырост найвышэйшы. Выглядаць буйнейшай і важнейшай — далёка не ключ да поспеху, адзначае Insider.
Па гадах выручка на супрацоўніка ў гэтых кампаніях змянялася наступным чынам. Самай нізкай у 2022 годзе яна выявілася ў Twitter — $317 333, у Amazon — $333 550, у Salesforce — $394 911. У Apple выручка на супрацоўніка вырасла ад $1,9 млн у 2020 годзе да $2,4 млн — у 2022-м.
Читать на dev.by