Кар'ерны дэйтынг: людзі ўсё часцей шукаюць сумоўі ў аплікацыях для спатканняў

Студэнты і маладыя спецыялісты адаптуюць свае профілі пад кар’ерныя мэты: указваюць прафесійныя інтарэсы, шукаюць людзей з патрэбных кампаній і выкарыстоўваюць мэтчы для афлайн-знаёмстваў і размоў пра працу. Гэта рэакцыя на зламаны працэс найму анлайн, дзе водгукі губляюцца, рэзюмэ адсейваюцца алгарытмамі, а прамы кантакт з працадаўцам робіцца рэдкасцю.

Па афіцыйных дадзеных, беспрацоўе ў ЗША ў 2025 годзе вырасла да 4,6%. Асабліва прыкметны рост сярод людзей з вышэйшай адукацыяй. Каля траціны карыстальнікаў дэйтынгавых аплікацый, якіх апытаў ResumeBuilder, спрабавалі ўстанавіць кантакт з людзьмі дзеля кар’ерных магчымасцяў. Большасць цэліліся ў супрацоўнікаў кампаній мары або ў людзей з жаданымі ролямі.

Трэнд не толькі пра студэнтаў і зумераў. Істотная частка карыстальнікаў, якія шукаюць працу праз дэйтынг-аплікацыі, — дасведчаныя спецыялісты з высокім даходам. Эксперты тлумачаць гэта тым, што асабістыя сувязі застаюцца самым эфектыўным спосабам знайсці працу ва ўмовах нявызначанасці, перагрузкі рэкрутараў і аўтаматызацыі найму.

Некаторыя стартапы і самі дэйтынгавыя сэрвісы заўважаюць, што частка карыстальнікаў стала прыходзіць за нетворкінгам і прафесійнымі кантактамі. Пры гэтым не ўсе платформы падтрымліваюць гэта — многія проста заяўляюць, што аплікацыі прызначаныя для знаёмстваў, а не для пошуку працы.

Даследчыкі лічаць, што масавым з’явай кар’ерны дэйтынг не стане. Хутчэй, гэта прыклад таго, як невялікая, але вынаходлівая частка карыстальнікаў пераасэнсоўвае лічбавыя інструменты пад свае задачы, каб павысіць шанцы на працаўладкаванне.

Практыка паказвае, што часам такія эксперыменты сапраўды прыводзяць да кароткатэрміновых праектаў або разавых кантрактаў. Але для многіх гэта дадатковая крыніца стрэсу, якая не замяняе традыцыйныя каналы пошуку працы.