Кенгуру з квітком не пусцілі ў самалёт. Карыстальнікі спрачаліся, ці быў ролік сапраўдным

У роліку жанчына спрачаецца з супрацоўніцай авіякампаніі, у той час як кенгуру цярпліва стаіць побач, быццам рыхтуецца да пасадкі на рэйс. Спакойныя паводзіны і выразныя вочы жывёліны скарылі гледачоў, многія з якіх палічылі ролік сапраўдным.

У X відэа сабрала больш за 4 мільёны праглядаў, а ў Instagram — звыш 10 мільёнаў. Карыстальнікі пакідалі каментарыі кшталту: «Ён трымае талон, нібыта ведае, што робіць!» або «Кенгуру спакайнейшы за большасць пасажыраў». Некаторыя нават жартавалі, ці прайшоў кенгуру праверку бяспекі.

Ролік быў створаны з выкарыстаннем генератыўнай мадэлі Veo 3 ад Google, якую прэзентавалі на канферэнцыі Google I/O 2025 20 мая. Гэтая мадэль, даступная падпісчыкам планаў AI Pro і AI Ultra, здольная генераваць відэа з аўтаматычным дадаваннем гуку і маўлення.

Нягледзячы на пазнаку «(AI)» у арыгінальным допісе, многія карыстальнікі паверылі ў сапраўднасць відэа. У каментарах разгарэліся спрэчкі: адны абураліся, што кенгуру «несправядліва» не пусцілі на борт, другія настойвалі, што жывёлам месца ў багажным адсеку.

Чат-бот Grok у адказ на запыты карыстальнікаў пацвердзіў, што відэа згенеравана ШІ, адзначыўшы адсутнасць навінаў пра падобныя рэальныя здарэнні. Хоць кенгуру сапраўды з’яўляліся ў аэрапортах — напрыклад, у Мельбурне ў 2013 годзе ці на рэйсе ў 2021 годзе, — няма доказаў таго, што яны спрабавалі стаць пасажырамі.