Кітай адказвае на тарыфы Трампа антыманапольным расследаваннем Google і новымі мытамі

Кітайскія ўлады неадкладна адрэагавалі на новыя амерыканскія тарыфы. У прыватнасці, Пекін увёў 15% мыта на амерыканскі вугаль і звадкаваны прыродны газ, а таксама 10% мыта на сырую нафту, сельскагаспадарчае абсталяванне і некаторыя аўтамабілі.

Дзяржаўнае ўпраўленне па рэгуляванні рынку Кітая пачало антыманапольнае расследаванне ў дачыненні да кампаніі Google. Расследаванне звязанае з меркаванымі парушэннямі антыманапольнага заканадаўства.

Кітай таксама дадаў амерыканскія кампаніі PVH Corp (уладальнік Calvin Klein) і Illumina Inc. у свой «спіс ненадзейных арганізацый». Прадстаўнікі кітайскага ўрада заявілі, што гэтыя кампаніі прымалі «дыскрымінацыйныя меры» супраць кітайскіх прадпрыемстваў.

Акрамя таго быў уведзены экспартны кантроль на такія матэрыялы, як вальфрам, тэлур, малібдэн, вісмут і індый. Гэтыя матэрыялы маюць вырашальнае значэнне для зялёнай энергетыкі і пераходу да вытворчасці чыстай энергіі.

Новыя тарыфы ЗША на кітайскія тавары ўступілі ў сілу 4 лютага пасля таго, як прэзідэнт ЗША Трамп неаднаразова папярэджваў Пекін аб недастатковых намаганнях па спыненні патоку незаконных наркотыкаў у Злучаныя Штаты.

Трамп заявіў, што калі Кітай не спыніць пастаўкі фентанілу, то тарыфы будуць «значна павышаныя». Кітай, у сваю чаргу, назваў праблему фентанілу «праблемай Амерыкі». У выніку аднабаковых дзеянняў ЗША Кітай таксама падаў пазоў у WTO.