Кітай будуе дата-цэнтр у космасе — сетку з 2800 ШІ-спадарожнікаў

Апараты вывеў у космас носьбіт «Чанчжэн-2D», а запуск быў абвешчаны паспяховым Кітайскай карпарацыяй аэракасмічнай навукі і тэхнікі (CASC). Кожны спадарожнік нясе на борце мадэль штучнага інтэлекту і здольны выконваць да 744 трыльёнаў аперацый за секунду.

У суме ўжо разгорнуты «кластар» дасягае 5 petaOPS. Спадарожнікі злучаюцца паміж сабой лазернымі лініямі сувязі са хуткасцю перадачы да 100 Гбіт/с і карыстаюцца агульным сховішчам аб’ёмам 30 ТБ, фармуючы адзіную вылічальную «воблачную» дата-інфраструктуру ў космасе.

У поўным выглядзе Three-Body Computing Constellation павінна ўключаць 2800 апаратаў з агульнай прадукцыйнасцю каля 1000 petaOPS, што набліжае яе да ўзроўню наземных суперкамп’ютараў. Размяшчэнне вылічальных магутнасцяў на арбіце дазваляе выкарыстоўваць сонечную энергію, эфектыўна адводзіць цяпло ў космас і скарачае вугляродны след у параўнанні з наземнымі дата-цэнтрамі.

Акрамя эканоміі рэсурсаў, касмічная сетка вырашае праблему традыцыйнай спадарожнікавай сувязі: большая частка спадарожнікавых дадзеных сёння не даходзіць да Зямлі з-за абмежаванай прапускной здольнасці і недахопу наземных станцый. Апрацоўка інфармацыі «на месцы» забяспечыць аператыўны маніторынг стыхійных бедстваў, стварэнне 3D-карт тэрыторый і іншыя дзеянні, якія патрабуюць хуткага аналізу.

Праект узмацняе тэхналагічную гонку паміж Кітаем і ЗША. Арбітальны суперкамп’ютар пераўтварае спадарожнікі з простых сэнсараў і рэтранслятараў у аўтаномныя вылічальныя вузлы, што дае відавочныя ваенныя перавагі. Эксперты чакаюць, што ЗША і Еўропа хутка прадставяць уласныя праекты ў адказ на кітайскую ініцыятыву.