Кітайская цэнзура будзе блакаваць «песімістаў» у сеціве

У заяве Упраўлення кіберпрасторы Кітая гаворыцца, што ў сацсетках выдаляецца кантэнт, які «скажае сацыяльныя з’явы», «выбарачна раздзімае негатыўныя выпадкі» ці «ўзмацняе пачуццё безвыходнасці».

Пад забарону трапляюць публікацыі з самапрыніжэннем, «паражэнскія наратывы» кшталту «намаганні бескарысныя», а таксама пасты, што «гандлююць трывожнасцю» вакол працы, адукацыі і асабістага жыцця.

Рост цэнзуры супаў з зацяжным эканамічным крызісам. Застой на рынку нерухомасці, падзенне спажывання і рэкордная беспрацоўе сярод моладзі (18,9% у жніўні) узмацнілі песімізм.

У адказ маладыя кітайцы папулярызуюць інтэрнэт-трэнды кшталту «ляжаць пласма» (кіт. «тан пін») — адмовы ад кар’ерных гонак, і новай з’явы «пацукі-людзі» (кіт. «лаашу жэнь»), якія аддаюць перавагу бавіць час у ложку і замаўляць ежу дадому.

Рэгулятар ужо аштрафаваў найбуйнейшыя сацсеткі Weibo, Kuaishou і Xiaohongshu за недастатковы кантроль над «шкодным кантэнтам». Карыстальнікаў заклікалі актыўна скардзіцца на падазроныя публікацыі, «каб супрацьстаяць падрыву грамадскага духу».

Дзяржаўныя СМІ падтрымалі кампанію, назваўшы яе «своечасовай» і накіраванай супраць хаосу ў сетцы. Аднак эксперты сумняваюцца, што ачыстка сацсетак зменіць агульны настрой.

Нягледзячы на высілкі ўладаў, аналітыкі лічаць, што карыстальнікі будуць знаходзіць новыя спосабы выказваць незадаволенасць і прыдумляць свежыя тэрміны для апісання свайго стану.