Кітайскі айцішнік ужо чатыры гады жыве ў машыне, хоць у яго ёсць вялізны дом

Чжану 41 год. Шэсць гадоў таму ён пераехаў па працы з роднага Янцзяна ў Шэньчжэнь. Абодва гарады знаходзяцца ў правінцыі Гуандун на поўдні краіны. Спачатку ён жыў звычайным жыццём і ездзіў са здымнай кватэры ў офіс і назад, плацячы прыблізна $340 за арэнду. Перагледзець звыклы лад жыцця яго прымусіў усяго адзін досвед — кемпінг у парку.

Чатыры гады таму Чжан набыў электракар. На заднім сядзенні змяшчаецца матрац, а ў машыне ёсць кандыцыянер, таму ўмовы даволі камфортныя. З таго часу на працягу працоўнага тыдня ён начуе ў машыне. Пасля працы вячэрае ў карпаратыўнай сталоўцы, прымае душ у спартзале і едзе на зарадную станцыю падзарадзіць электракар, а потым адпраўляецца ў парк спаць. Па яго словах, у парку выдатныя грамадскія прыбіральні, дзе можна памыцца. На выходных ён вяртаецца дадому, каб памыць брудную вопратку і пабавіць час з сям’ёй. Дорога займае 300 км у адзін бок.

Пры такім ладзе жыцця праграміст траціць на ежу і іншыя выдаткі ў сярэднім каля $14 у дзень. Напрыклад, паркоўка ў парку каштуе ўсяго каля 8 цэнтаў за ноч, а каля офіса — менш за $2,8. Але Чжан настойвае, што жыве так не з-за сквапнасці, а проста таму, што яму гэта зручна і падабаецца — маўляў, гэта дае поўную свабоду. Ён кажа, што не памяняў бы свабоду парка нават на бясплатную арэнду кватэры. Але пры гэтым прызнае, што за тры гады зэканоміў каля $14 тысяч.

Да пераезду ён працаваў дыстанцыйна і зарабляў каля $1400 у месяц. Калі праект скончыўся, ён пераехаў у Шэньчжэнь, дзе цяпер зарабляе ў некалькі разоў больш.

«Шмат якіх праграмістаў звальняюць, як толькі ім спаўняецца 35. Мне пашанцавала, што я дагэтуль маю працу ў Шэньчжэне. Планую папрацаваць яшчэ некалькі гадоў і вярнуцца дадому да сям’і», — кажа Чжан.

Яго гісторыю ўпершыню распавялі кітайскія тэлеканалы, і яна выклікала бурнае абмеркаванне ў сацсетках. Каментатары пішуць, што зайздросцяць і што ў яго, напэўна, моцнае здароўе, а ў горадзе па начах вельмі цёпла. Скептыкі ж адзначаюць, што ўсе зэканомленыя грошы ён, напэўна, траціць на платныя дарогі.