У Tesla самая высокая смяротнасць у ДТЗ — удвая вышэйшая за сярэднюю ў галіне

Прадметам разгляду сталі аўтамабілі 2018-2022 мадэльных гадоў і аварыі, якія адбыліся з імі ў 2017–2022 гадах і скончыліся гібеллю пасажыраў.

За электракарамі Tesla зафіксавана 5,6 фатальных аварый на кожны мільярд пройдзеных міль — гэта максімальны паказчык у галіне. Далей ідуць Kia (5,5) і Buick (4,8). Сярэдняе значэнне па краіне складае 2,8 смяротных аварый на мільярд міль.

Што тычыцца асобных марак, то ў Tesla Model S аварыйнасць са смяротным зыходам больш чым у два разы вышэйшая за сярэднюю (5,8), а ў Tesla Model Y — самага прадаванага аўтамабіля ў свеце — наогул амаль у чатыры разы вышэйшая (10,6). Гэта шостае месца ў агульным заліку: першае — у Hyundai Venue (13,9).

Аўтары дакладу падкрэсліваюць, што атрыманыя высновы не кажуць аб апрыёрнай небяспечнасці або канструктарскіх памылках у транспартных сродкаў Tesla. Наадварот, яны аснашчаныя рознымі функцыямі бяспекі, а Страхавы інстытут дарожнай бяспекі (IIHS) аддаў Model Y 2024 года перамогу ў намінацыі на самы бяспечны аўтамабіль. Многія аўто, якія занялі высокія пазіцыі ў трывожным спісе, маюць высокія рэйтынгі бяспекі ад IIHS і NHTSA.

У iSeeCars тлумачаць становішча Tesla ў спісе збегам такіх абставін, як паводзіны кіроўцаў і дарожныя ўмовы, якія прыводзілі да часцейшых ДТЗ са смярцямі. Уважлівы кіроўца, які рухаецца з разумнай хуткасцю і не знаходзіцца пад уздзеяннем забароненых рэчываў, будзе асцярожны незалежна ад маркі яго аўтамабіля.