Праблемы з псіхікай у людзей дасягнулі маштабаў пандэміі

Эпідэміёлагі Ёркскага ўніверсітэта адзначаюць, што ступень праблемы выклікае вялікую занепакоенасць, асабліва сярод моладзі. Часам іх пытаюцца, ці не сталі яны больш даследаваць псіхічныя разлады проста таму, што людзі ахвотней скардзяцца. «Але рост настолькі велізарны, што нешта відавочна адбываецца», — адзначаюць у ВНУ.

Прычыны глабальнага псіхічнага крызісу вар'іруюцца ад высокага кошту жыцця да злоўжывання сацсеткамі. Кампаніям у святле гэтага трэба задумацца пра тое, як паклапаціцца пра дабрабыт супрацоўнікаў.

Паводле даных СААЗ, пагаршэнне маральнага здароўя, якое цягнецца ад пачатку тысячагоддзя, узмацнілася каранавірусам. За 2020 і 2021 гады колькасць выпадкаў дэпрэсіі ў свеце вырасла на 25%, і да дапандэмійных значэнняў чалавецтва яшчэ не вярнулася.

Эксперты адзначаюць, што праблем працуючым бацькам дадае пагаршэнне псіхічнага стану ў дзяцей. Калі ў 2017 годзе ў Вялікабрытаніі псіхічныя разлады падазраваліся ў кожнага дзявятага дзіцяці, то ў 2023-м такіх было амаль удвая больш — у кожнага пятага.

Паводле глабальнага апытання 12,2 тысячы супрацоўнікаў ад Mindforward Alliance, часцей, чым у іншых сферах, псіхічныя праблемы назіраюцца ў фінансавых і юрыдычных кампаніях. Але выявілася, што менавіта ў гэтых галінах кампаніі ўкладаюць больш за ўсё намаганняў у маральнае здароўе супрацоўнікаў. У кампаніях, дзе менеджары адкрыта прызнаюць і вырашаюць праблему, падтрымку адчуваюць 85% супрацоўнікаў, а ў тых, якія не робяць гэтага, — 31%.

Напрыклад, у брытанскай фінансавай кампаніі Brightstar супрацоўнікам раз на месяц ладзяць сустрэчы з лайф-коўчам, таксама тут ужо шмат гадоў ёсць спецыялісты, якія аказваюць псіхалагічную дапамогу. Укладанні акупіліся: паменшылася цякучасць персаналу, супрацоўнікі радзей бяруць бальнічныя, а прадукцыйнасць на 40-60% вышэйшая ў параўнанні з іншымі кампаніямі.

Да аналагічных высноў прыйшлі даследчыкі Оксфарда, якія апрацавалі водгукі мільёна супрацоўнікаў 1782 публічных амерыканскіх кампаній з джабборда Indeed. Яны выявілі моцную ўзаемасувязь паміж дабрабытам супрацоўнікаў і паказчыкамі кампаній.