Николай Чикишев world 19 жніўня 2026, 15:29

«Кола ўзаемнай пыхі»: у Крэмніевай даліне прыдумалі новую лаянку для трудаголікаў

У тэхасяроддзі набірае папулярнасць слова grindslop — так называюць паказныя пасты пра звышурочную працу, начныя змены і «жыццё дзеля стартапа».

Пакінуць каментарый

«Кола ўзаемнай пыхі»: у Крэмніевай даліне прыдумалі новую лаянку для трудаголікаў

У тэхасяроддзі набірае папулярнасць слова grindslop — так называюць паказныя пасты пра звышурочную працу, начныя змены і «жыццё дзеля стартапа».

У Крэмніевай даліне словам grindslop называюць пасты, у якіх заснавальнікі стартапаў і супрацоўнікі тэхкампаній публічна хваляцца звышурочнай працай або патрабуюць такога ж падыходу ад іншых, піша Business Insider.

Адзін з нядаўніх прыкладаў — пост 25-гадовага сузаснавальніка Mintlify Хана Вана пад назвай «Не забывайцеся не ўсміхацца». Сам Ван казаў, што хацеў напісаць пра неабходнасць «кідаць сабе выклік і шукаць дыскамфорт», але многія ўспрынялі тэкст як заклік працаваць да знясілення.

«Гэта рэакцыя супраць усіх гэтых шалёных лозунгаў пра працоўную этыку. На два тыдні я стаў сасудам для ўсяго гэтага раздражнення», — расказаў Ван.

Дакладнае паходжанне слова grindslop невядома, але яго папулярнасці дапамог эсэ прадпрымальніка Уіла Манідыса пра культ заснавальнікаў стартапаў. Паводле ягонай фармулёўкі, у такіх кампаніях «дакументаванне гадзін працы і дэманстрацыя пакутаў становяцца прадуктам самі па сабе».

Нагодай для крытыкі стала новая культура працы ў ШІ-стартапах. У індустрыі ўсё часцей абмяркоўваюць графік 996 — з 9 раніцы да 9 вечара шэсць дзён на тыдзень, начныя змены і пастаянны вайб-кодынг. Адны лічаць такі рэжым нармальнай цаной за ўдзел у ШІ-буме, іншыя — шкоднай дэманстрацыяй звышурочнай працы.

Венчурны інвестар Мартын Тобіяс сам трапіў пад абвінавачванні ў grindslop пасля паста пра тое, што заснавальнікі кампаній не павінны апраўдвацца стомленасцю пасля прыцягнення інвестыцый. «Сабака можа спаць увесь дзень. У яе няма табліцы капіталізацыі», — напісаў ён.

«4 гады ва ўніверы — гэта занадта доўга»: CEO OpenAI лічыць, што двух гадоў вышэйшай адукацыі дастаткова

Тобіяс з крытыкай не пагадзіўся. Паводле яго, ён выступаў не за бессэнсоўную звышурочную працу, а за працу над сапраўды важнымі задачамі. «Я не хачу, каб у вас быў доўгі спіс справаў і вы папросту выкрэслівалі выпадковыя пункты. Я хачу, каб вы рабілі рэчы з вялікім эфектам», — растлумачыў ён.

Некаторыя заснавальнікі лічаць, што такія пасты ствараюць ціск на ўсю індустрыю. «Было сумна, калі гэта пачало пераходзіць з інтэрнэту ў рэальнае жыццё», — сказаў 20-гадовы заснавальнік ШІ-стартапа Supermemory Дхрав’я Шах.

Прафесар Нью-Ёркскага ўніверсітэта Рубі Джастыс Тэлат параўнаў grindslop з пастамі са спартзалы, дзе людзі дэманструюць дысцыпліну і прапануюць навакольным рабіць тое ж самае. Паводле яго, раней статус паказвалі праз дэманстратыўнае спажыванне, потым — праз дэманстратыўную творчасць, а цяпер настала эпоха «дэманстратыўнай вытворчасці».

Заснавальнікі стартапаў, апытаныя выданнем, лічаць, што падобныя публікацыі часта адрасаваны не супрацоўнікам або кліентам, а інвестарам. «Усё гэта накіравана на інвестараў. Карыстальнікам усё роўна», — заявіў Дхрав’я Шах.

Сузаснавальнік Sixtyfour Саарт Шах лічыць, што культура стартапаў у цэлым змянілася. «Раней стартапы былі групай занудаў, якія вырашалі складаныя задачы, таму што ім было цікава. Цяпер гэта ператвараецца ў кола узаемнай пыхі», — заявіў ён.