Выпускніца Оксфарда бясплатна дапамагае беларусам паступіць за мяжу — напішыце да 10 ліпеня

У беларусаў — новая некамерцыйная група падтрымкі. Каманда ментараў Bright Belarus будзе бясплатна дапамагаць беларусам любога веку, якія жадаюць паступіць у найлепшыя ўніверсітэты свету. 

Заяўкі прымаюць да 10 ліпеня. Адбор удзельнікаў — да 1 жніўня. Сама праграма доўжыцца ад жніўня 2024 года да чэрвеня 2025 года. 

Што за праект

Прыватная ініцыятыва беларускі, юрысткі, выпускніцы Оксфарда Лізы Трахілінай і каманды ментараў розных прафесій (у ёй ужо 20 чалавек), якія адвучыліся ў сусветных універсітэтах і зрабілі кар’еру. Настаўнікі абяцаюць адабраным кандыдатам бясплатна дапамагчы паступіць у замежную ВНУ, атрымаць стыпендыю або трапіць на стажыроўку. У планах: парады па рэзюмэ і партфоліа; развіццё хард- і софтскілоў, нэтворкінг з крутымі беларусамі. 

Хто сярод ментараў

Распрацоўшчыкі, журналісты, бізнэсмены, музыканты, даследчыкі AI, біяінфарматыкі, генныя Інжынеры, эканамісты, паэты, спартсмены, юрысты і біяфізікі. Выпускнікі ўніверсітэтаў у Гарвардзе, Кембрыджы, Оксфардзе, Эдынбургу, Гарвардзе, Берліне ды інш.

Што яшчэ прапаноўваюць

Летні анлайн-інтэнсіў па біятэхналогіях і стартапах BioTech Connect — для студэнтаў-біёлагаў і сумежных спецыяльнасцяў ад навукоўцаў і прадстаўнікоў бізнэсу.

Бясплатныя двухтыднёвыя стажыроўкі для двух чалавек у беларускай бібліятэцы імя Францыска Скарыны ў Лондане для студэнтаў, магістрантаў і аспірантаў, захопленых беларускай культурай і гісторыяй. 

За чый кошт?

Ментары дапамагаюць бясплатна. Сайт і стажыроўкі ў Скарынаўскай бібліятэцы фаўндарка аплачвае сама (+яшчэ адзін чалавек з дыяспары). Яна працуе юрысткай у Вялікабрытаніі.

Навошта гэта фаўндарцы і камандзе

— Я з горада Заслаўя, — кажа Ліза. — Скончыла БДУ, а потым паступіла ў магістратуру Оксфарда, дзе вучылася бясплатна. Ва ўсіх нашых ментараў падобныя гісторыі. Яны вучыліся ў беларускіх школах і ўніверсітэтах, а потым паступілі на бясплатнае навучанне ў Гарвард, Оксфард, Кембрыдж, Стэнфард і г. д.

Я веру ў каштоўнасць гэтага праекта для беларусаў і маю невялікую магчымасць вярнуць тое, што калісьці ўклалі ў мяне. Мы верым у патэнцыял беларусаў і хочам, каб у іх было больш магчымасцяў навучацца за мяжой і раскрываць свой патэнцыял.

Навошта наогул таленавітым беларусам дапамога

— Першае, многія беларусы не вераць, што пасля сваіх школ і ўніверсітэтаў яны змогуць бясплатна вучыцца ў топавых універсітэтах свету, — пералічвае Ліза. — Мы паказваем, што гэта магчыма, што такія беларусы існуюць і што яны вучыліся ў тых жа навучальных установах.

Другое, нават калі людзі ўпэўненыя ў паступленні, ім патрэбная дапамога ў пазіцыянаванні свайго досведу для атрымання стыпендыі. Адная рэч напісаць у рэзюмэ, што ты арганізаваў канферэнцыю па адукацыі, і іншая — што сабраў каманду з пяці чалавек, якая правяла самую вялікую канферэнцыю па адукацыі ў краіне з 600+ удзельнікамі. Мы маем уяўленне, што хочуць бачыць у заяўках замежныя фонды і ўніверсітэты, і гатовыя падзяліцца гэтым досведам.

Трэцяе, ва ўніверсітэтах розных краін ёсць фінансы для падтрымкі замежных студэнтаў, у тым ліку з Беларусі. Замежныя ВНУ гатовыя плаціць за нашую адукацыю, бо мы дапамагаем узбагачаць іх студэнцкую супольнасць. Мы хочам дапамагчы беларусам зразумець сваю каштоўнасць, каб яны атрымлівалі стыпендыі на міжнародную адукацыю і раскрывалі свой патэнцыял.

Колькі чалавек пройдуць адбор