Беларускія кампаніі ў Літве працягваюць скарачаць каманды. Wargaming — у лідарах па адтоку

На пачатак года ў 20+ вядомых ІТ-кампаніях з беларускімі каранямі было зарэгістравана больш 3,4+ тысячы супрацоўнікаў, цяпер іх менш за 3,3 тысячы.

Найбольш спецыялістаў з пачатку года страціў геймдэв. У прыватнасці, толькі з Wargaming і MA (экс-Melsoft LT) сышлі сумарна амаль 70 супрацоўнікаў.

На сёння ў літоўскім офісе Wargaming зарэгістраваны 801 чалавек. Пры захаванні такога тэмпу адтоку (прыкладна 10 супрацоўнікаў у месяц) да канца года літоўская каманда можа скараціцца да 700 спецыялістаў.

У той жа час кампанія працягвае наймаць людзей у літоўскі офіс. На сайце Wargaming размешчана 16 вакансій для працы ў Літве з указаннем зарплат. У залежнасці ад пазіцыі зарплата вагаецца ад 2,5 да 7 тысяч еўра брута.

У MA на пачатку года працавала амаль 200 чалавек, цяпер — ужо 160.

У топ-3 па колькасці звольненых супрацоўнікаў у Літве з пачатку года — EPAM. За мінулы год літоўская каманда скарацілася амаль на 180 чалавек (мінус 12,5%). Цяпер у двух філіялах (у Вільні і Коўне) зарэгістравана каля 1,2 тысячы супрацоўнікаў. Са студзеня каманда страціла каля 20 спецыялістаў.

З топ-10 найбуйнейшых ІТ-кампаній з беларускімі каранямі ў Літве толькі ў дзвюх колькасць супрацоўнікаў вырасла з пачатку года. У літоўскім офісе Gurtam каманда павялічылася з 218 да 225 чалавек, у Godel — з 90 да 99.

За мінулы год ІТ-сектар Літвы страціў больш за 400 беларускіх айцішнікаў. За гэты год адток можа быць такім жа.

На адток айцішнікаў з Літвы працягвае ўплываць міграцыйная палітыка літоўскіх уладаў у дачыненні да беларусаў.

Камітэт Сейма Літвы па нацыянальнай бяспецы і абароне ў пачатку красавіка падтрымаў ідэю ануляваць выдадзеныя беларусам віды на жыхарства за надта частыя паездкі дадому — часцей, чым раз на тры месяцы.

Таксама за мінулы год амаль 600 беларусаў прызналі пагрозай нацыянальнай бяспецы Літвы. Сярод іх ёсць і айцішнікі.

А за першы квартал гэтага года ў Літве рэзка паменшылася колькасць беларусаў з ВНЖ. Па стане на 1 красавіка ў Літве заставалася 53 739 грамадзян Беларусі з дзеючым ВНЖ. Гэта на 3772 чалавекі менш, чым было на пачатку года. Для параўнання, за ўвесь 2024 год колькасць беларусаў з ВНЖ у Літве скарацілася на 4656 чалавек.