У Ліцэі БДУ — рэкордны конкурс-2023. Матэматыка і фізіка ў топе

У ліцэях гэтымі днямі праходзяць уступныя выпрабаванні. У наймацнейшым з іх, ліцэі БДУ, сёлета рэкордна высокі конкурс — амаль 9 чалавек на месца. На 264 месцы прэтэндуюць 2072 абітурыенты, з іх 34 — без экзаменаў.

Пры гэтым самая высокая канкурэнцыя — за права вучыцца ў матэматычным класе — большая за 15 чалавек на месца. Трохі саступае матэматыцы фізіка — 14 чалавек на месца.

Крыху ніжэй у рэйтынгу грамадазнаўчы, хімічны і інфарматыка-матэматычны профілі. А замыкае спіс гуманітарны клас (беларуская мова, гісторыя Беларусі) — «толькі» 2,70 чалавека на месца. Пры гэтым конкурс у філалагічны клас (руская, замежная мовы) у разы вышэйшы: 8+ чалавек.

Гэты расклад істотна адрозніваецца ад таго, што было ў папярэднія гады. Так, летась конкурс у матэматычны і фізічны класы быў значна меншы — 5,17 і 4,40 чалавека адпаведна, а ў лідарах попыту быў інфарматыка-матэматычны клас (8,53).

У абсалютных ліках больш за ўсё ахвотных было вучыцца на біялагічным профілі, але там і набор у два разы вышэйшы, ніж на іншых напрамках (верагодна, перадзаказ на медыкаў). Попыт на навучанне ў гуманітарным класе быў адным з самых высокіх (7,60), а ў філалагічным, наадварот, самым нізкім (2,50). Як, зрэшты, і ў інфарматыка-фізічным (2,84). У сярэднім жа конкурс у ліцэй ледзь перавысіў 5 чалавек.

А найбольш анамальным быў 2021 год. Конкурс у матэматычны клас тады перавысіў 41 (!) чалавека на месца, у фізічны — 26, у інфарматыка-матэматычны — 21, гуманітарны — 18. Але нават пры такіх паказчыках лідараў, што зашкальваюць, сярэдні конкурс быў крыху ніжэйшы, ніж сёлета — 8,56 чалавека. А агульная колькасць абітурыентаў была на 3% ніжэйшай.

Што падштурхнула конкурс сёлета? Першым напрошваецца адказ — скарачэнне колькасці ліцэяў. Апошнія наборы ў ліцэі № 1 і № 2 у Мінску прайшлі ў 2021 годзе, у 2023 годзе яны меліся спыніць працу.

Іншы фактар — ад гэтага года выпускнікі ліцэя БДУ (і яшчэ двух) пры ўмове выдатнай паспяховасці змогуць паступаць у свае ВНУ без экзаменаў. Што праўда, крыніцы ў самім ліцэі мяркуюць, што наўрад ці гэта фактар прыцягнення. Маўляў, амаль палова выпускнікоў ліцэя паступае ў замежныя ВНУ, і БДУ для іх не такая ўжо вабная мэта.

Трэці — права абітурыентаў сёлета падаваць заявы адразу на два напрамкі. У гэтым выпадку абедзве заявы ўлічваюцца ў конкурсе. У якасці эксперымента ўпершыню такое права (здаецца, можна было выбраць нават больш за два профілі) было дадзенае абітурыентам у 2021 годзе — верагодна, яно і ўзняла конкурс да нябёсаў.

У 2022-м напал знізіўся праз тое, што Ліцэй БДУ страціў права праводзіць уступныя экзамены самастойна і раней за іншыя ліцэі. Калі раней школьнікі маглі бязбольна выкарыстоўваць пробны іспыт, а пры няўдачы падацца ў іншы ліцэй, то цяпер правал тоіць у сабе непаступленне ў аніякі.

Такім чынам, фактары, якія ўплываюць на конкурс у ліцэй, рознаскіраваныя. Рэкордны конкурс гэтага года, хутчэй за ўсё, вынік скарачэння колькасці ліцэяў і права падавацца на два профілі адначасова.

А вось перавагі школьнікаў у частцы навучальных профіляў, якія змяняюцца, — нагода для рэфлексіі. 

Попыт на дакладныя навукі заўсёды быў высокім, і такім і застаўся.

dev.by, як і іншым сумленным медыя, сёння вельмі складана: рэдакцыя працуе па-за межамі краіны, а нашыя рэкламныя даходы скараціліся ў некалькі разоў. Але мы даем рады — з вашай дапамогай. Гэта вы дзеліцеся з намі інфанагодамі, думкамі, досведам, часам і ўвагай. А 210 чытачоў падтрымліваюць нас данатамі.

У 2023 годзе мы хочам сабраць 1000 чытачоў-падпісчыкаў. 

Дапамагчы нам можна праз Patreon. 

З Беларусі — праз Donorbox.

І яшчэ крыптой, тут гаманцы.

Дзякуй, што прачыталі гэтае паведамленне.