Касмічнае смецце пашкодзіла электрасілкаванне кітайскай касмічнай станцыі

«Базавы модуль „Цяньхэ“ касмічнай станцыі сутыкнуўся з частковай стратай энергазабеспячэння праз уздзеянне касмічнага смецця на сілавыя кабелі сонечнага крыла», — расказаў намеснік кіраўніка кітайскага агенцтва пілатаваных касмічных палётаў (CMSA) Лінь Сіцян. Ведамства не патлумачыла, што гэта былі за абломкі.

Для рамонту ашалёўкі станцыі члены экіпажа місіі «Шэньчжоу-17» правялі два выхады ў адкрыты космас. Кітайскія інжынеры аптымізуюць сістэму папярэджання і прадухілення такіх сутыкненняў. Паводле даных кітайскіх СМІ, спецыялістам удалося знізіць узровень ілжывых спрацоўванняў сістэм апавяшчэння на 30%.

CMSA плануе правесці дбайнае абследаванне станцыі «Цяньгун» з вонкавага боку з выкарыстаннем камеры высокай разрознасці. Яе размесцяць на рабатызаваным маніпулятары станцыі. Члены экіпажа наступнай місіі «Шэньчжоу-18» працягнуць вывучаць ашалёўку, а таксама ўсталююць узмоцненую абарону вонкавых кабеляў і крытычна важнага абсталявання. Запуск місіі прызначаны на 25 красавіка.