Каціроўкі Reddit узляцелі амаль у 1,5 разу ў першы дзень IPO
Учора Reddit правёў першаснае размяшчэнне акцый. Нягледзячы на тое, што сацыяльная платформа яшчэ не прыносіць прыбытку, курс яе каштоўных папер пры канцы гандлёвага дня на NYSE падняўся на 48%. Гэта сведчыць пра аднаўленне цікавасці інвестараў да IPO, адзначае Reuters.
IPO было праведзенае па цане $34 за акцыю пры ацэнцы ў $6,4 млрд. Таргі ў чацвер стартавалі па $47, а завяршыліся на адзнацы ў $50,44 за штуку.
Reddit прыцягнуў акцыянераў у тым ліку тым, што пазіцыянуе свой кантэнт як трэніровачную базу для АІ-сістэм. У лютым стала вядома, што Reddit уклаў ліцэнзійную ўгоду з Google на $60 млн на год.
Галоўнай крыніцай даходаў платформы з’яўляецца рэклама. Аднак Reddit называе важным напрамкам росту штучны інтэлект. Таксама плануецца пашыраць аўдыторыю і супольнасць. Эксперты лічаць, што інвестары гатовыя заплюшчыць вочы на стратнасць кампаніі праз яе патэнцыял для росту — такога на рынку не назіралася па меншай меры апошнія тры гады.
Reddit падаў заяўку на IPO яшчэ ў 2021 годзе. Яно пастаянна адкладалася праз складанасці на фондавым рынку, выкліканыя вайной ва Украіне і павышэннем працэнтнай стаўкі ФРС.
Читать на dev.by