Крамянёвая даліна патраціць $100 млн на лабіраванне інтарэсаў ШІ
Тэхналагічныя інвестары і кампаніі ў ЗША ствараюць сетку лабісцкіх арганізацый, каб прасоўваць «сяброўскае» ШІ-рэгуляванне і змагацца з кандыдатамі, якія выступаюць за жорсткі кантроль тэхналогій.
Венчурны фонд Andreessen Horowitz, прэзідэнт OpenAI Грэг Брокман з жонкай Аннай, а таксама Perplexity і інвестар Рон Конвей ствараюць сетку палітычных арганізацый пад назвай Leading the Future.
Гаворка ідзе пра super-PAC. Political Action Committee — гэта палітычны камітэт у ЗША, які збірае грошы ад кампаній, арганізацый ці прыватных асоб і накіроўвае іх на падтрымку кандыдатаў, партый або заканадаўчых ініцыятыў.
У адрозненне ад звычайных PAC, super-PAC можа траціць неабмежаваныя сумы на агітацыю і рэкламу (але не наўпрост фінансаваць кандыдатаў), што робіць іх адным з самых уплывовых інструментаў палітычнага лабізму ў краіне.
Як паведамляе The Wall Street Journal, на кампанію плануецца выдаткаваць больш за $100 мільёнаў, каб падтрымліваць кандыдатаў, якія выступаюць за «разумныя правілы» ў сферы ШІ, і аслабіць пазіцыі тых, хто дамагаецца жорсткага рэгулявання.
Арганізатары ініцыятывы — паліттэхнолагі Джош Власта і Зак Мофат — падкрэсліваюць, што мэта праекта не адмена рэгулявання, а прадухіленне «стракатай коўдры законаў», якое, на думку індустрыі, можа запаволіць інавацыі і аслабіць пазіцыі ЗША ў канкурэнцыі з Кітаем.
Першымі мішэнямі кампаніі стануць Нью-Ёрк, Каліфорнія, Ілінойс і Агаё. У аснове стратэгіі — досвед крыптавалютнай сеткі Fairshake, якая падтрымлівала Дональда Трампа на выбарах.
«Leading the Future» мае намер дзейнічаць надпартыйна і выкарыстоўваць лічбавую рэкламу і ахвяраванні на выбарчыя кампаніі для прасоўвання сваіх мэтаў.
Читать на dev.by