Найбуйнейшыя банкі ЗША распрацоўваюць канкурэнта гаманцу Apple

У праекце сярод іншых удзельнічаюць Wells Fargo, JP Morgan Chase і Банк Амерыкі. Яны распрацоўваюць новае аплатнае рашэнне для анлайн-пакупак з выкарыстаннем лічбавага гаманца, прывязанага да крэдытнай або дэбетавай карты.

Аператарам будзе выступаць кампанія Early Warning Services, якая належыць банкам і цяпер кіруе сэрвісам грашовых пераказаў Zelle. Новы гаманец яшчэ не атрымаў назвы і будзе рэалізоўвацца асобна ад Zelle. Яго плануюць пачаць выкочваць у другой палове 2023 года.

Дэталі функцыянавання новай сістэмы пакуль прапрацоўваюцца. Магчыма, яна будзе працаваць так: карыстальнікі будуць уводзіць адрас электроннай пошты на старонцы аплаты крамы, якая будзе звязвацца з EWS. Тая будзе запытваць дазволу на транзакцыю ў банка, пасля чаго карыстальнік зможа выбраць, якую карту выкарыстоўваць, або адмовіцца ад пакупкі.

Паводле плана, першапачаткова сэрвіс будзе падтрымліваць у суме прыкладна 150 млн трымальнікаў карт Visa і Mastercard. Калі ён набярэ папулярнасць, у яго могуць дадаць іншыя магчымасці аплаты, напрыклад, напрамую з банкаўскага рахунку.

Акрамя Apple Wallet новы прадукт будзе канкурэнтам PayPal. Ён патрэбны банкам для таго, каб выключыць тэхнагігантаў накшталт Apple з узаемадзеяння з кліентамі, а таксама знізіць узровень ашуканскіх дзеянняў, якімі грашыць Zelle.