Буйныя геймстудыі лічаць, што развіццё ААА-відэагульняў зайшло ў тупік

Як адзначае The New York Times, нават такія паспяховыя праекты, як Marvel’s Spider-Man 2 коштам $300 мільёнаў не могуць пазбегнуць эканамічных цяжкасцяў. Нягледзячы на продаж больш як 11 мільёнаў копій, распрацоўшчык гульні Insomniac Games, які належыць Sony, быў вымушаны звольніць многіх супрацоўнікаў праз невысокія продажы.

Раней у гейміндустрыі фотарэалізм быў сінонімам якасці, аднак сучасныя гульцы ўсё часцей аддаюць перавагу гульням з простым графічным выкананнем, такім як Minecraft, Roblox і Fortnite. Гэтыя праекты прыцягваюць мільёны карыстальнікаў сваім сацыяльным складнікам і магчымасцю ствараць унікальны гульнявы вопыт.

У выніку індустрыя заўважыла спад цікавасці да буйнабюджэтных адзіночных гульняў, а агульная аўдыторыя геймераў упершыню за дзесяцігоддзі пачала скарачацца. Геймеры стаміліся ад аднастайнага рэалістычнага стылю, а дарагая графіка не заўсёды паляпшае гульнявы працэс. Напрыклад, рэмайстры накшталт The Last Of Us: Part II дэманструюць толькі нязначныя паляпшэнні, прыкметныя толькі невялікай групе гульцоў.

Многія студыі пачынаюць шукаць іншыя кірункі, напрыклад, распрацоўка гульняў з базавай графікай, даступных на смартфонах, прыносіць большы фінансавы вынік. Папулярнасць такіх гульняў, як Genshin Impact, даказвае, што гульцы больш цэняць рэгулярнае абнаўленне кантэнту, чым дарагую візуалізацыю.

Некаторыя распрацоўшчыкі, напрыклад, Ubisoft, спрабавалі перанесці кінематаграфічны вопыт у віртуальную рэальнасць, але праз дарагоўлю абсталявання такія гульні не апраўдалі чаканняў. У той жа час кампаніі, такія як Nintendo, паказваюць, што крэатыўны падыход і ўнікальны стыль могуць прыносіць вялікі прыбытак. Іх гульні, такія як Luigi’s Mansion 3, прадаюцца паспяховей за кінематаграфічныя праекты на PlayStation 5.

Эксперты лічаць, што індустрыі неабходна адаптавацца да новых рэалій. Геймеры хочуць не толькі гуляць, але і ўзаемадзейнічаць адно з адным. Калі студыі змогуць знайсці баланс паміж якасцю, коштам распрацоўкі і сацыяльным аспектам гульняў, індустрыя зможа перажыць крызіс, піша выданне.