Хто цяпер заплаціць падаткі двойчы? 2 кейсы на прыкладзе Польшчы (актуальна для 27 краін)

Пастанова Саўміна № 164 ад 7 сакавіка 2024 года «Пра пытанні падаткаабкладання» часткова прыпыняе дзеянне пагадненняў аб пазбяганні двайнога падаткаабкладання з 27 дзяржавамі да канца 2026 года. Спіс шмат у чым супадае з пералікам «недружалюбных краін». Пры гэтым пад прыпыненне падпадаюць тры палажэнні — пра дывідэнды, пра працэнты і пра даходы ад адчужэння маёмасці.

Хто мэтавая аўдыторыя навін і як гэта можа працаваць на практыцы? Партнёрка, кіраўніца падатковай і карпаратыўнай практыкі ALG LEGAL Лідзія Ражкова патлумачыла на прыкладзе Польшчы.

Што будзе пасля частковага скасавання пагадненняў Беларуссю?

Міжнародныя акты, у тым ліку пагадненні аб пазбяганні двайнога падаткаабкладання, маюць большую юрыдычную сілу, чым нацыянальнае падатковае заканадаўства.

Калі пагаднення паміж краінамі няма або яго дзеянне прыпыненае, то кожная краіна дзейнічае ў адпаведнасці са сваім нацыянальным падатковым заканадаўствам, і гэта можа выклікаць падвойнае падаткаабкладанне.

Для чаго гэта зрабілі?

З нашага пункта гледжання, для скасавання магчымых вызваленняў і вылікаў, якія прадугледжаны міжнароднымі дамовамі ў дачыненні да дывідэндаў, працэнтаў і даходаў ад адчужэння маёмасці. Гэта закране і юрыдычных, і фізічных асоб.

Пастанова № 164, акрамя іншага, павышае стаўку падатку да 25% на дывідэнды і прыраўнаваныя да іх даходы, якія атрымліваюцца ад крыніц у Беларусі замежнымі кампаніямі з «недружалюбных краін». Для фізічных асоб таксама ўстаноўлена падвышаная стаўка падаткаў на дывідэнды ў частцы перавышэння 200 000 BYN.

Прыпыненне дзеяння пагадненняў не дазволіць скарыстацца вылікамі або іншымі больш ільготнымі, чым нацыянальныя, умовамі падаткаабкладання.

А што гэта азначае на практыцы? Ці можна канкрэтныя кейсы?

Разгледзім пару выпадкаў на прыкладзе пагаднення аб пазбяганні двайнога падаткаабкладання паміж Беларуссю і Польшчай.

Кейс 1

Польскі падатковы рэзідэнт-фізасоба атрымлівае дывідэнды ад удзелу ў беларускай кампаніі. 

Як было раней

Паводле дамовы, фізасоба аплачвала падатак у Беларусі ў памеры 10% пры валоданні больш як 30% долей/акцый у кампаніі або 15% (калі падатак у Беларусі быў меншы, значыць менш) — пры валоданні меншай доляй.

У Польшчы гэты чалавек выплачваў розніцу паміж аплачаным у Беларусі падаткам і польскай стаўкай 19%. 

Як будзе, калі Польшча таксама адмовіцца ад пагаднення

Беларусь запатрабуе аплаты падатку ў адпаведнасці са сваім заканадаўствам — 13% (агульнаўстаноўленая стаўка па дывідэндах) плюс 25% ад сумы перавышэння 200 000 BYN (для кампаній-нерэзідэнтаў ПВТ). 

У Польшчы таксама давядзецца аплаціць поўны падатак — 19%.

Як будзе, калі Польшча працягне дзеянне пагаднення ў аднабаковым парадку?

Беларусь запатрабуе аплаты падатку ў Беларусі ў адпаведнасці са сваім заканадаўствам — 13% (агульнаўстаноўленая стаўка па дывідэндах) плюс 25% ад сумы перавышэння 200 000 BYN (для кампаній-нерэзідэнтаў ПВТ).

Польшча будзе дазваляць вылік падатку ў адпаведнасці з лімітамі, вызначанымі ў пагадненні, то-бок 10 і 15% адпаведна.

Кейс 2

Фізасоба — падатковы рэзідэнт Беларусі атрымлівае дывідэнды ад удзелу ў польскай кампаніі.

Як было раней

Чалавек аплачваў падатак у Польшчы ў памеры 10% пры валоданні больш як 30% долей/акцый у кампаніі або 15% — пры валоданні меншай доляй.

У Беларусі ён даплачваў розніцу паміж польскім падаткам і 13% (агульнаўстаноўленая стаўка па дывідэндах). 

Як будзе, калі Польшча таксама адмовіцца ад пагаднення

У Польшчы чалавек заплаціць 19%. Падаткі пералічыць сама юрыдычная асоба, якая выплачвае прыбытак.

Беларусь таксама запатрабуе падатак у поўным аб’ёме — 13% (агульнаўстаноўленая стаўка па дывідэндах) плюс 25% ад сумы перавышэння 200 000 BYN (для кампаній-нерэзідэнтаў ПВТ).

Як будзе, калі Польшча працягне дзеянне пагаднення ў аднабаковым парадку

Чалавек аплаціць у Польшчы падатак у памеры 10% пры валоданні больш як 30% долей/акцый у кампаніі або 15% — пры валоданні меншай доляй.

Беларусь запатрабуе падатак у поўным аб’ёме, то-бок 13% (агульнаўстаноўленая стаўка па дывідэндах) плюс 25% ад сумы перавышэння 200 000 BYN (для кампаній-нерэзідэнтаў ПВТ).