Што з арэндай у Польшчы. Гісторыі айцішнікаў, якія пераехалі пасля 24 лютага

Трохі статыстыкі

1. На 34% у сярэднім падаражэла арэнда кватэр у Польшчы (кастрычнік 2022 года да кастрычніка 2021-га).
2. Сярэдняя арэндная плата за кватэру ў Польшчы ў другім квартале склала 3179 злотых (у лютым — 2770 злотых).
3. Мацней за ўсё за год выраслі цэны на «кавалеркі» — нават у маленькіх гарадах больш як на 25%. 
4. 50% да цаны за год дадалі кавалеркі ў Варшаве і 30% — двушкі.
5. Кватэра 30 квадратаў у Варшаве каштуе ў сярэднім 2571 злоты, такая ж ва Уроцлаве — 2471 злоты, у Гданьску — 2400 злотых (і гэта — без усіх збораў-чыншаў).
6. Эксперты сумняваюцца, што жытло ў Польшчы патаннее найбліжэйшым часам. Хаця можна заўважыць спад у параўнанні з вясной, пры канцы 2022 года цэны будуць на 7-12% вышэйшыя за мінулы год. І ў 2023 годзе наўрад ці стануць ніжэйшымі.

Як здымалі ў 2022

«Калі патэлефанаваць адразу ж — усё адно будзеш 5-6 у чарзе»

Аляксандра з хлопцам знайшла кватэру ў Варшаве ў верасні 2022 (Srodmescie). 52 метры, 5200 злотых.

— Мы спампавалі разнастайныя праграмы і падпісаліся на ўсе тэлеграм-каналы, якія адразу ж публікуюць аб’явы.

Спачатку разглядалі максімум 3500-4000 злотых, але з кожным днём мы разумелі, што ў цэнтры такое немагчыма, і дайшлі да 5000 злотых.

Калі патэлефанаваць адразу ж, то ўсё адно будзеш 5-6 у чарзе на прагляд. За дзень гаспадару тэлефануе па 60-70 чалавек, таму звычайна добрая кватэра больш за дзень не вісіць на сайце. 

Польскай мы яшчэ не знаем, таму шукаць было складана: прасілі сяброў тэлефанаваць гаспадарам кватэр і распісваць нас у найлепшых фарбах.

Была адная добрая трохпакаёўка, але калі мы прыехалі яе глядзець, цана вырасла ў 2 разы: перад намі ўкраінка з сынамі так моцна хацела гэтую кватэру, што вырашыла адразу прапанаваць гаспадару плату ў разы вышэйшую.

Праз 2 тыдні маніторынгу аб’яў мы знайшлі кватэру з добрым гаспадаром, якому ўсё адно, хто мы, галоўнае, што мы плацежаздольныя.

«Выглядала як здзек: кавалерка за 4000 злотых, пры гэтым ніякіх жывёл, не курыць і не быць замежнікам»

Андрэй пераехаў у Варшаву з жонкай і сабакам у лістападзе. Знялі двушку на 60 квадратаў у раёне Воля — 3500 злотых + электрычнасць.

— Кватэру шукалі на месцы, пакуль жылі ў сяброў два тыдні.

Потым мы сталі шукаць не толькі на вядомых сайтах, але і ў групах на фэйсбуку. Там кватэры былі часта лепшымі і таннейшымі, многія не выстаўляліся на olx і otodom (там мы сваю і знайшлі). А яшчэ падключылі робата @rielgobot па пошуку адпаведнага варыянта ў тэлеграме.

Большасць палякаў разумела англійскую або перадавала слухаўку дзецям. Пыталіся, адкуль мы, пра працу, а потым казалі — ператэлефануйце праз тры дні. У некаторых мы наўпрост пыталіся, каторыя мы ў чарзе на прагляд (бывалі і сёмымі). Звычайна сэнсу чакаць няма: добрую кватэру да таго моманту ўжо здымуць.

Карацей, пошук доўжыўся два тыдні, за гэты час мы паглядзелі каля 15 кватэр і абтэлефанавалі не менш за сотню. Пра сабаку вырашылі загадзя не казаць — досвед сяброў паказвае, што калі вы спадабаліся гаспадару, ён пагодзіцца і на маленькага «песэка». Некалькі гаспадароў расказалі пра нянавісць да жывёл, яшчэ парачка папрасіла патройны заклад за сабачку.

Адзін з варыянтаў нам вельмі спадабаўся, але гаспадар папрасіў ператэлефанаваць праз тыдзень, калі выселяцца яго кватаранты-ўкраінцы. Сказаў, што мы першыя ў чарзе. Мы ў думках змірыліся, што праз тыдзень нас пашлюць, але не. Стэлефанаваліся, прыехалі і адразу пагадзіліся падпісваць дакументы.

Пра сабаку сказалі: гаспадар быў не вельмі рады, але мы запэўнілі, што ён добры, а на выпадак, калі раптам здурэе, мы ўсё пакрыем. Праз два дні ён даслаў нам на імэйлы дамову старонак на 10, дзе было прапісана ўсё, аж да нашага сабакі і кожнай драпіны ў доме, і папрасіў падпісаць умову аказіянальную (Натарыяльна засведчаная дамова, якая замацоўвае, што кватарантам ёсць куды пераехаць. Інакш жыхароў з дзецьмі можа быць амаль немагчыма выселіць, нават калі яны не плацяць. — Заўв.)

Яшчэ праз тры дні мы засяліліся ў кватэру на 60 квадратаў з усёй тэхнікай і нядрэнным рамонтам, вялікім балконам і апранальняй за 3500 злотых + электрычнасць. Хаця аднаго моманту мы былі гатовыя кінуць гэтыя пошукі і зняць што заўгодна, цярпенне ўзнагародзілася.

«Варыянты сарваліся праз тое, што іншыя здымшчыкі перабілі цану»

Яшчэ адзін чытач зняў 48 «квадратаў» з жонкай, двума дзецьмі і сабакам у Лодзі за 3450 злотых.

— Жытло я пачаў шукаць за 2-3 тыдні да выезду з Беларусі з дапамогай сябра, які жыве ў Польшчы і знае мову. Справа была ў маі 2022 года. Я знаходзіў прыдатны мне варыянт, а ён тэлефанаваў, дамаўляўся наконт прагляду, ехаў аглядаць, ацэньваў раён, умовы.

Давялося паглядзець тры варыянты да таго, як знайшлі патрэбны. Першы быў у «гета» праз нязнанне раёнаў, другі і трэці сарваліся праз тое, што іншыя наймальнікі перабілі цану. Але ў выніку ўсё атрымалася да лепшага.

Дарэчы, у комплексе шмат замежнікаў, і ніякай агрэсіі да беларусаў няма.

«Засяліліся ў першую кватэру, хоць разумелі, што дорага і зусім не тое»

Святлана з мужам і катом зняла кватэру ў Гдыні ў красавіку 2022 года.

— Здымаем двушку ў 35 метраў у новым доме за 3200 (2600 арэнда, 100 — гараж, 500 — чынш).

Кватэру знайшлі не з першага разу — прайшлі праз кастынгі і чэргі на прагляд. Пры пошуку жытла гаспадары распытвалі ўсіх, ці ёсць дзеці, кім працуюць і колькі зарабляюць патэнцыйныя арандатары, і выбіралі зручнейшага для сябе.

У нас быў кот, таму часта адмаўлялі яшчэ на моманце запісу на прагляд (у аб’яве не заўжды пазначаная інфармацыя пра жывёл). У выніку засяліліся ў першую-лепшую кватэру, хоць разумелі, што дорага і зусім не тое, чаго хацелі, але тады не было магчымасці круціць носам. 

Цяпер да сумы ў 3200 злотых дадалося ацяпленне і пералік па вадзе і святле — 500 злотых (такія пералік раз на паўгода). Таму неўзабаве плануем пераязджаць у Гданьск, дзе цэны пайшлі ўніз, але з катом той яшчэ квэст чакае.

Колькі сёння плацяць за жытло тыя, хто пераехаў да вайны

Спойлер, які можа выклікаць міжвольны слезацёк у тых, хто нядаўна пераехаў: аднапакаёўку ў пешай даступнасці ад цэнтра Кракава і цяпер можна здымаць за 1950 злотых, а двушку ля метро ў Варшаве — за 2900 злотых.

«Гаспадыня дакупіла ў кватэру абсалютна ўсё: посуд, бытавую тэхніку, нават лямпачкі, мыльніцы і пасцельную бялізну»

Ірына з’ехала ў Варшаву ў кастрычніку 2019 года і ад таго часу здымае двушку з калегай у раёне Бемава. Кошт — 2900 злотых.

— Кватэру мы з калегай знайшлі за адзін дзень, проста тэлефануючы па аб’явах на otodom і olx. Польскую я да моманту пераезду знала на побытавым узроўні, таму складанасцей у зносінах не было.

З трох варыянтаў гэты мы паглядзелі першым і ён адразу спадабаўся, але для заспакаення сумлення паглядзелі і астатнія. Там склалася адчуванне, што ў кватэру звезлі ўсю непатрэбную мэблю і дываны і хаатычна гэта раскідалі. Мы знялі першы варыянт, але ён быў ад агента, так што мы заплацілі яшчэ 200 еўра за паслугі.

Гэта быў зусім новы дом і новая вялікая кватэра, у ёй ёсць два санвузлы і прасторны балкон. Гаспадыня дакупіла ў кватэру абсалютна ўсё: посуд, бытавую тэхніку, нават лямпачкі, мыльніцы і пасцельную бялізну! Тады да цэнтра трэба было ехаць на аўтобусе, а цяпер у 7 хвілінах хады ёсць метро. Але наогул тут заўсёды была выдатная інфраструктура — крамы, пякарні, кавярні пад бокам.

Гаспадыня першапачаткова была супраць катоў і сабак, якія могуць нашкодзіць рамонту. Пасля вайны ва Украіне я завяла пацука ў клетцы, ёй нічога не сказала (яна потым заўважыла, але нічога не сказала).

Гаспадыня, дарэчы, заўсёды пытаецца пра Беларусь, як там мае калегі за кратамі, вельмі хвалюецца, што я дадому ніколі не езджу.

«Паляк скінуў мне 200 злотых пасля таго, як даведаўся, што я з Беларусі»

Аляксей пераехаў у Кракаў у 2021 годзе з катом, здымае паўтарачку ў 42 метры за 2700 злотых.

— У лістападзе 2021 года трапіць у Польшчу было сапраўдным квэстам — межы закрытыя, усюды кавідныя абмежаванні. Таму шлях расцягнуўся на тры дні: цягнік да Масквы, потым пералёт у Грэцыю, потым самалёт у Кракаў. Спачатку жыў у сябра. 

За актыўны пошук узяўся на пачатку лютага 2022 года. Спрабаваў сам шукаць на сайтах, хадзіў на прагляды, але кожнага разу перад званком у дзверы мне казалі, што толькі што жытло здалі. Вырашыў пашукаць з дапамогай агенткі, украінку з ведамі польскай параілі калегі ў працоўным чаце.

Агентка прапаноўвала нешта вельмі рэдка, і ўсё зусім міма: то кавалерка, то без жывёл, то за 3700 злотых (а я паставіў парог у 3000). Тады вырашыў паралельна шукаць сам. Вельмі дапамог тэлеграм-бот, які збірае рэлевантныя прапановы ў рэалтайме.

У выніку знайшоў выдатны варыянт — 42 квадраты ў паўгадзіны пешшу да старога горада, у доме з садам і падлогамі з падагрэвам.

Я засяляўся ў кватэру за тыдзень да пачатку вайны і да таго, як цэны паляцелі ў космас. У верасні мне павялічылі кошт на 200 злотых, бо камуналка стала расці, але я не супраць — усё адно плачу менш за кошт на рынку. Ніякіх умоў аказіянальных, штомесячных праверак і гемарою з камуналкай — я плачу штомесяц па 2700 злотых і больш нічога (нават інтэрнэт там ужо быў).

«З двума катамі было складана знайсці прыдатную кватэру, асабліва — калі ў ёй свежы рамонт»

Андрэй з двума катамі зняў аднапакаёўку 30 «квадратаў» недалёка ад цэнтра Кракава ў верасні 2020 года. Цяпер ён плаціць 1950 злотых за ўсё і не думае перасяляцца. 

— Спачатку я плаціў 1300 злотых за арэнду і яшчэ 300 за чынш, і аднаго разу даплачваў за перарасход вады. Потым чынш і інфляцыя выраслі, я стаў плаціць 1400 за арэнду і 450 — чынш.

З двума катамі было складана знайсці прыдатную кватэру, асабліва — калі ў ёй свежы рамонт. Часта адмаўлялі адразу, але цяперашніх гаспадароў доўга ўгаворваць не прыйшлося: я сказаў, што жывёлы стэрылізаваныя, і калі што сапсуюць — вылічвайце з маёй каўцыі. У мяне камфортная кватэра «без празмернасцей», дый з катамі па-іншаму на ўсё глядзіш: каб ім было дзе разгарнуцца і пры гэтым не забіцца. 

Мне таксама зручна тут: да цэнтра можна дайсці пешшу або чатыры прыпынкі праехаць на трамваі, побач Каўфлэнд і купа Бядронак. Цяпер стала крыху менш камфортна — паўгода пад домам трывала будоўля развязкі трамваяў.

І яшчэ адразу пасля вайны і патоку ўцекачоў, што рынуў у Кракаў, у пад’ездзе стала нашмат брудней, гэта вельмі кідаецца ў вочы. Шкада, што ў людзей такое спажывецкае стаўленне да здымнага жытла. Але перасяляцца я не планую — з цяперашнімі цэнамі на жытло варыянты, якія мне пасуюць, будуць куды даражэйшымі.

«Дамовіліся без агентаў: змяшалі беларускую з украінскай — і нас зразумелі»

Беларус з жонкай і катом пераехалі ў горад «да 500 тысяч жыхароў» пасля падзей 2020 года. Кошт 50 «квадратаў» — 2800 за ўсё на месяц.

— Варшаву адразу адкінулі, бо сталіца прыцягвае непатрэбную дадатковую вартасць да ўсяго.

У мястэчкі пабаяліся ехаць (хаця дарма, у Польшчы яны таксама выявіліся прыстойнымі). У выніку выбіралі паміж нашым невялікім горадам (называць яго не хачу) і Лоддзю, але Лодзь падалася вельмі ўжо дэпрэсіўнай.

Па прыездзе некалькі дзён вывучалі сайт otodom.pl. Нават дамовіліся з нейкай блогеркай, што яна дапаможа пагутарыць з гаспадарамі, бо мы фактычна не зналі польскай. Але бліжэй да прагляду тая зафанабэрылася і пачала ставіць умовы. У выніку мы дамовіліся самі: змяшалі беларускую з украінскай — і нас зразумелі. А мы польскую на слых разумелі неяк адразу нядрэнна.

У выніку ўсе тры ўладальнікі запрасілі на прагляд. У аднаго нават быў «запасны варыянт» і ён нас сам вазіў у іншую частку горада паказваць. Усе кватэры былі новенькія, абсталяваныя і прыгожыя. Так што мы яшчэ і выбіралі з улікам раёна і інфраструктуры паблізу.

У выніку знялі двухпакаёўку плошчай амаль 50 метраў у новым доме, у пад’ездзе кансьерж і падземная паркоўка. Плацілі першапачаткова 2600 за ўсё, пасля пачатку вайны і змены курса злотага пагадзіліся на ўзняцце кошту да 2800 налета.

«Пасля года арэнды нам паднялі кошт да 7000 злотых, але мы не супраць»

Улад зняў кватэру ў Варшаве ў лістападзе 2021 года. Спачатку за 5600 злотых, цяпер арэнда паднялася да 7000 злотых. У кватэры жыве ён, жонка, двое дзяцей, кот і вялікі сабака.

— Мы знялі кватэру за 5600 злотых (гэта арэнда плюс чынш, электрычнасць аплачваю асобна — ад 250 да 350 злотых). У кватэры тры пакоі плюс салон, сумешчаны з кухняй, яна вельмі вялікая — 110 метраў квадратных.

У кошт арэнды таксама ўваходзіць месца ў падземным паркінгу, камора, доступ у сауну і трэнажорная зала.

Што праўда, пасля года арэнды нам паднялі кошт да 7000 злотых, але мы не супраць: цяпер аналагічнае жытло каштуе значна больш.

«Павышэнне да 2700 злотых — апошняя кропля на карысць пераезду ў Беласток»

Яшчэ адзін падпісант Dzika падзяліўся тым, як змяніў кватэру ў Кракаве на таннейшы Беласток.

— Спачатку я здымаў кавалерку за 1300 злотых плюс 350 чынш. Праз год мне стала цесна, і я перабраўся ў еўрадвушку (2250 злотых за ўсё). Улетку 2022 года гаспадыня напісала, што ў сувязі з павышэннем працэнтаў іпатэкі яна хацела б падняць кошт жытла да 2700. Гэта стала апошняй кропляй на карысць таго, каб перабрацца ў Беласток, дзе танней. Да таго ж, гэта найбліжэйшы да роднай Горадні горад — знаёмы, утульны.

Перавозчыка ў Беласток знайшоў праз тэлеграм за 270 у. е. Загадзя дамовіўся на прагляд некалькіх кватэр, заехаў у апошні дзень чэрвеня і зняў пакой на месяц (каб знайсці кватэру спакойна). 1 ліпеня пайшоў глядзець кватэру і адразу ж яе зняў. Аддаў каўцыю, атрымаў ключы. Дом 2016-га года, адэкватны гаспадар, спакойны раён. Агульны метраж 42 квадратныя метры + балкон на ўсю шырыню кватэры.

Дамовіўся з гаспадаром, у якога зняў пакой на месяц, што раз ужо я ў яго пабыў усяго суткі, то грошы (300 злотых) ён пакідае сабе, а мне дапамагае з перавозкай рэчаў. У выніку ён за два пераезды машынай перавёз усе рэчы з аднаго канца Беластока ў іншы.

За апошні месяц падрос чынш і я заплаціў 2200 злотых за ўсё. Кватэра мяне цалкам задавальняе: калі нічога не зменіцца ў Беларусі, то буду яе працягваць налета.

«Калі прыйшоў рахунак за газавае ацяпленне ў 900 злотых, вырашыла пашукаць нешта таннейшае»

Тэсціроўшчыца Марына пераехала ў Гданьск у 2018 годзе ўдваіх з катом і ад таго часу перажыла мноства ўдалых і не вельмі пераездаў.

— Шукала жытло на месцы сама па прыватных аб’явах. Да пераезду проста праглядала аддалена і пісала ў otodom на англійскай гаспадарам, пару чалавек адказалі, што можна паглядзець. Па прыездзе яны альбо не адказвалі, альбо не гаварылі па-англійску, адзін з іх ператэлефанаваў і на грубай рускай адказаў, што ўжо здаў.

У выніку праз тыдзень пошукаў я зняла за 1350 злотых 70-метровую двушку недалёка ад старога горада, але там было жахліва холадна. А калі прыйшоў рахунак за газавае ацяпленне ў 900 злотых, вырашыла пашукаць нешта таннейшае.

Яшчэ праз паўгода я пераехала ў Кракаў, дзе зняла першую ж кватэру. Заўважыла,што ў Кракаве арэндадаўцы ахвотней размаўляюць на англійскай. Па цане там таксама было каля 2 тысяч злотых за студыю ў трохі страшнай маласямейцы, але затое сетка спецыяльная для кошкі на балконе была ўсталяваная.

А ад пачатку 2021 я часова не ў Польшчы, але вяртаюся ў студзені ў Варшаву. Разумею, што цяпер «мае» варыянты выходзяць каля 3000 злотых.

«Першы год плацілі 2400, цяпер — 3500, але гэта ўсё адно ніжэй за рынкавы кошт»

Яўген з сям’ёй пераехаў ва Уроцлаў у лістападзе 2020.

— Знайшлі сваю кватэру праз групы па арэндзе жытла — закінулі пару пастоў пра тое, хто мы, што шукаем і які ў нас бюджэт, з нюансаў — у нас 3 каты. Нам накідалі прапаноў і мы спыніліся на адной кватэры, у якой жывем дагэтуль. Кватэра двухпакаёвая, 42 метры, блізка да цэнтра, з паркінгам і вялікім балконам. Мы першыя жыхары пасля пабудовы дома. 

Першы год цана была 2400 zł (арэнда 1900 + камуналка і інтэрнэт 500), другі год — 2450 zł (1900 + 550), але ў сярэдзіне года павысілі да 2705 zł (1900 + 805), трэці год будзе 3500 zł (2500 + 1000). Але гэта ўсё яшчэ ніжэй за рынкавы кошт за аналагічнае жытло.

Як зняць жытло мары ў Польшчы — абагульнілі парады

1. Шукайце не толькі на папулярных Otodom.pl і Olx.pl, але і на менш вядомых Morizon.pl, nieruchomości-online.pl і г. д. Палякі часта прадаюць і купляюць рэчы, а таксама здаюць і здымаюць жытло праз маркетплэйс Facebook, таму зазірніце ў групы накшталт Wynajem mieszkanie/pokój w Warszawie — там бываюць варыянты па прыемнейшых цэнах.
2. Уважліва чытайце аб’яву, бо загалоўная сума часта ўключае толькі арэндную плату. Да яе потым дадаецца kaucja (зваротны заклад), czynsz (плата за камуналку без лічыльнікаў, напрыклад, за вываз смецця), media (эксплуатацыйныя выдаткі, якія залежаць ад спажывання — электрычнасць, ацяпленне, вада, газ). Інтэрнэт таксама часцей за ўсё падключае сам арандатар.
3. Калі вырашылі звярнуцца да агентаў, плаціць лепш па факце заключэння дамовы. Калі заплаціце да гэтага — хутчэй за ўсё, застаняцеся без грошай і здымнага жытла. Ніякіх платных рэзервацый або гарантый прагляду да заключэння дамовы найму.
4. Усталюйце @rielgobot або @PLHomeFinderBot, якім вы самі задаяце параметры пошуку, а яны шукаюць варыянты з папулярных сайтаў.
5. Убачылі добры варыянт — адразу тэлефануйце і дамаўляйцеся на прагляд, інакш ужо праз 5 хвілін можна стаць 49-м у чарзе.
6. Можна скласці пра сябе ліст (у ідэале на польскай), прымацаваць фота і рассылаць уладальнікам упадабанага жытла або ў групы па найманні ў фэйсбуку.
7. Калі арэндадаўца не напісаў нічога пра жывёл у аб’яве, лепей не апавяшчаць яго да прагляду пра гадаванцаў. Скажыце пра гэта пасля знаёмства. Часам тыя, хто першапачаткова былі супраць, пагодзяцца здаваць кватэру з жывёлай (для самых упартых прапануйце купіць гадавую страхоўку на выпадак, калі гадаванец нешта пашкодзіць — яна каштуе каля 100 zł на год).
8. Часта ўладальнікі здаюць жытло па Umowa najmu okazjonalnego — гэта дамова, якая дапаможа выселіць нядобрасумленнага арандатара без суда (ёсць кейсы, дзе арэндадаўцы з Umowa najmu не маглі выселіць арандатараў-неплацельшчыкаў больш за 8 гадоў). Для ўкладання дамовы вам трэба згода ўласнікаў жытла ў Польшчы (шукайце па знаёмых або спецыяльныя фірмы). Удакладняйце, хто аплаціць спадарожныя выдаткі (засведчанне ў натарыуса ў прысутнасці перакладчыка абыдзецца ў 400 zł). Усю суму можа ўзяць на сябе арандатар, арэндадаўца або можна падзяліць яе напалову.
9. Прафесійныя фота часцей за ўсё азначаюць, што кватэра ад агента, а ў рэальнасці яна будзе значна меншай (і горшай). Таму не бойцеся разглядаць аб’явы з «мыльнымі» фота — у рэальнасці ўсё можа быць куды лепей. Акрамя таго, агенты часта бяруць аб’явы ад гаспадароў і «пераздаюць» іх, таму на двух розных сайтах адна і тая ж кватэра можа быць як ад уладальніка, так і ад агента.
10. Падчас засялення сфатаграфуйце (а ў ідэале — адзначце ў акце прыёмкі кватэры) усе дэфекты кватэры — ад цвікоў у сцяне і драпін на стале да плям на канапе. Каб нядобрасумленны арандатар не захацеў потым вылічыць гэта з вашай каўцыі.

Очень подробный гид по жизни в Польше из личного опыта

По теме

Очень подробный гид по жизни в Польше из личного опыта

Как купить квартиру в Польше, Грузии, Албании. 4 истории от айтишников

По теме

Как купить квартиру в Польше, Грузии, Албании. 4 истории от айтишников