Беларускія ІТ-кампаніі, якія мігравалі ў Літву, прынеслі ёй €90 млн чыстага даходу за апошні год

«Паводле нашых падлікаў, за мінулы год дзяржава атрымала каля 90 мільёнаў еўра чыстай выручкі толькі ў ІТ-сектары дзякуючы рэлакаваным [беларускім] кампаніям», — адзначыў намеснік міністра эканомікі Літвы Караліс Жамайціс. Ён дадаў, што дадатковая выгада атрыманая за кошт занятасці, дадатковага спажывецкага попыту і падаткаў.

Пасля выбараў 2020 года ў Літву выехала велізарная колькасць беларусаў, якія ратаваліся ад пераследу за ўдзел у пратэстах. Асабліва Літва была зацікаўлена ў высокакваліфікаваных ІТ-спецыялістах. Туды сыходзілі цэлыя ІТ-кампаніі, а з сабой перавозілі тысячы сваіх супрацоўнікаў, якія маглі лёгка атрымаць часовыя дазволы на жыхарства. Але цяпер, праз тры гады, абстаноўка становіцца больш варожай, і ў беларускіх эмігрантаў узнікаюць праблемы з прадаўжэннем дазволаў на пражыванне ў Літве.

Літва ўскладае на Беларусь такую ж адказнасць, як і на Расію, за яе атаку на Украіну, і ўвяла абмежаванні супраць беларусаў. Напрыклад, для атрымання візы або дазволу ім цяпер трэба запаўняць анкету з пытаннямі аб тым, хто вінаваты ў вайне, і прыналежнасці Крыма.

Паводле слоў літоўскіх міграцыйных органаў, некаторыя выказваюць падтрымку вайне, за што атрымліваюць адмову. Яшчэ адная нагода — служба ў сілавых структурах, паколькі гэта патэнцыйна азначае дачыненне да рэпрэсій у Беларусі. За апошнія 6 месяцаў часовы дазвол на пражыванне ў Літве атрымалі каля 20 тысяч беларусаў, аднак колькасць адмоў расце. Нярэдка адпаведныя рэкамендацыі паступаюць з Дэпартамента дзяржбяспекі, які разглядае кожную заяўку ў індывідуальным парадку.

Беларусы, якім адмоўлена ў дазволе на жыхарства, абавязаныя пакінуць краіну цягам месяца. Калі іх разглядаюць як пагрозу нацыянальнай бяспецы Літвы, то дэпартуюць неадкладна.

Між тым Мінэканомікі Літвы падкрэслівае эканамічную выгаду, якую краіна атрымлівае ад кваліфікаваных прыезджых беларусаў. З ініцыятывы менавіта гэтага ведамства тры гады таму так шмат беларусаў змаглі лёгка атрымаць тут дазволы. Скептыкі сцвярджаюць, што Літве варта прыцягваць айцішнікаў з іншых краін.