Lesta Games актыўна хайрыць Беларусі на пачатку 2024. Хто яшчэ
Паглядзелі, якія кампаніі наймаюць у беларускіх офісах і каго шукаюць.
Змест
А тут расказвалі, як хайраць кампаніі з беларускімі каранямі ў Польшчы і Літве.
Lesta Games
Вясной 2022 Wargaming заявіў аб сыходзе з Беларусі і Расіі. Гульнявы бізнэс быў перададзены ў лакальнае кіраванне расійскай Lesta Studio.
Да вайны ва Украіне менавіта ў Беларусі быў найбуйнейшы офіс Wargaming — на 2 тысячы спецыялістаў. Пасля сыходу кампаніі з Беларусі каманда, якая засталася ў Lesta, скарацілася ў 4 разы. Увосень 2022 у штаце працавала каля 530 чалавек. Аднак летась Lesta актыўна наймала людзей і каманда павялічылася да 800 чалавек.
— У Lesta, па сутнасці, не было іншага выбару, акрамя як кампенсаваць найманнем, альбо скарачаць падтрымку прадуктаў. Таму нанялі шмат людзей, але гэта ўсяго-ткі аднаўленне штату для існай колькасці прадуктаў, — расказвалі восенню мінулага года супрацоўнікі.
Судзячы з усяго, на пачатку гэтага года кампанія актывізавала найманне. На сайце rabota.by за апошні час з’явілася адразу каля 40 вакансій ад Lesta Games. Патрэбныя распрацоўшчыкі, дызайнеры, аналітыкі, інжынеры.
iTechArt
У беларускім офісе пры канцы мінулага года працавала каля 950 чалавек. За два гады каманда скарацілася ў тры разы. Адначасова штат літоўскага офіса вырас да 210 чалавек.
Увесну 2023 iTechArt правяла рэбрэндынг — цяпер гэта Vention. Пры гэтым офісам у Беларусі і Украіне застаўся ранейшы брэнд.
Паводле слоў супрацоўнікаў, «найманне адкрытае толькі пад канкрэтныя праекты, але пры гэтым у аддзел распрацоўкі ўнутранага софту найманне асобнае і заўсёды адкрытае. Прычым могуць наймаць на пазіцыі, з якіх у суседніх аддзелах звальняюць. Супрацоўнікі гэта бачаць і задаюць нязручныя пытанні менеджарам, але ўсе адказы вельмі абцякальныя».
Цяпер на сайце размешчана ўсяго 4 вакансіі для працы ў Мінску. Кампанія шукае Market Researcher, Senior/Lead Oracle Engineer, Middle Oracle Engineer і Marketing Data Miner. У прыватнасці, спецыялісты патрэбныя для працы на праекце па распрацоўцы і суправаджэнні аўтаматызаванай банкаўскай сістэмы.
У апісанні вакансій няма інфармацыі пра заробак, але iTechArt абяцае плаціць «у прывязцы да долара». Дадамо, што летась кампанія замарозіла перагляд заробкаў. Супрацоўнікам абяцаюць магчымасць працаваць аддалена і карыстацца медыцынскай падтрымкай.
Itransition
У беларускім офісе Itransition працуе менш за 1000 супрацоўнікаў (мяркуючы з профіляў спецыялістаў у лінкедзіне). Яшчэ ў 2021 годзе каманда налічвала 2,5 тысячы спецыялістаў, а Itransition уваходзіла ў топ-5 найбуйнейшых ІТ-кампаній у Беларусі.
У 2022 годзе пасля пачатку вайны ва Украіне кампанія прыпыняла найманне супрацоўнікаў у беларускі офіс, які працягваў працаваць (у Расіі кіраўнік кампаніі Сяргей Гвардзейцаў прадаў свой ІТ-бізнэс).
Пазней кампанія аднавілі найманне. Цяпер на сайце 11 вакансій, дзе ў якасці лакацыі на выбар ёсць Беларусь.
Itransition патрэбныя спецыялісты рознага профілю, у прыватнасці, распрацоўшчыкі (iOS, Ruby on Rails), Data Engineering, Business analytics and consulting, Regional Sales Manager/Director, Editor / Content Team Lead. Кампанія адзначае, што рэалізоўвае праекты для такіх вядомых кампаній, як PayPal, Wargaming, Xerox, Philips, Adidas, Toyota.
Andersen
У Andersen у Беларусі працуе 500+ супрацоўнікаў. За два гады каманда скарацілася ў два разы. Яшчэ ў 2021 годзе Andersen уваходзіла ў топ-10 найбуйнейшых ІТ-кампаній Беларусі па памеры штату. Тады ў кампаніі працавала амаль 1000 супрацоўнікаў.
У сакавіку 2022 года Andersen абвясціла, што спыняе працу ў РФ і разрывае партнёрскія адносіны з расійскімі кліентамі. Цяпер кампанія засяроджаная на праектах з заходнімі заказчыкамі. Расійская частка бізнэсу перайшла да расійскай кампаніі Aston. На сайце Aston у пераліку лакацый з’явіліся офісы Andersen у Мінску, Гомелі, Полацку і Віцебску. У маі 2022 года ў офісе па суседстве з «Андэрсенбел» была зарэгістраваная «Астан Софт».
У снежні мінулага года супрацоўнікі Andersen расказвалі, што «сітуацыя з праектамі ў кампаніі цяжкая. Бэнч амаль не трымаюць, адразу прапаноўваюць звольніцца на пагадненне бакоў, калі раптам нешта не выйшла з праектам ці ён раптам скончыўся… Кампанія актыўна звальняе, бо ўвесь час спрабуе знайсці кагосьці танней і прадаць даражэй».
Цяпер кампанія актыўна шукае людзей на стажыроўку. Толькі за апошні час Andersen размясціла на сайце rabota.by больш за 20 прапаноў прайсці стажыроўку на розных напрамках (PHP, DevOps, iOS, Android, Business Analysis, Design Trainee).
Тым, хто прайшоў стажыроўку, кампанія абяцае працаўладкаванне ў офісах у Беларусі (Мінск, Полацк, Віцебск, Гомель або Беларусь remote). Сярод усіх новых прапаноў толькі адная вакансія — для Junior Sales Manager — тычыцца менавіта наймання на працу ў Беларусі.
LeverX Group
У Беларусі да пачатку поўнамаштабнай расійска-ўкраінскай вайны працавала асноўная каманда LeverX Group — каля 1100 чалавек. Цяпер асноўная каманда працуе ў Польшчы. У беларускім офісе засталося 100+ супрацоўнікаў.
Кампанія працягвае кропкава наймаць спецыялістаў. За апошні месяц LeverX Group размясціла больш за 10 вакансій на rabota.by. шукае, у прыватнасці, распрацоўшчыкаў, Data Scientist, Business Development Manager, UX/UI Designer.
Innowise Group
У кампаніі некалькі офісаў у розных рэгіёнах Беларусі, у тым ліку ў Мінску. Колькі дакладна супрацоўнікаў працуе сёння ў краіне — невядома. Яшчэ ў 2021 годзе Innowise Group уваходзіла ў топ-20 найбуйнейшых ІТ-кампаній у Беларусі.
На пачатку мінулага года ў кампаніі былі скарачэнні штату. Innowise Group звальняла супрацоўнікаў на бэнчы. У кампаніі тады заявілі, што скарачэнні сталі «рэакцыяй на запыты рынку». Пры гэтым кампанія набірае новых супрацоўнікаў і штат працягвае расці.
На сайце амаль 40 вакансій, палова з іх — для працы ў Беларусі. Большасць вакансій для распрацоўшчыкаў (iOS, Android, Python). Таксама кампаніі патрэбныя інжынеры, Database Administrator, Sales Manager, Delivery Manager.
Международный деловой альянс/IBA
У 2022 годзе IBA Group выйшла са складу заснавальнікаў кампаніі «Міжнародны дзелавы альянс». Сёння IBA займаецца заходнімі праектамі, а «Міжнародны дзелавы альянс» — праектамі на тэрыторыі СНД. У кастрычніку мінулага года кампанія ўклала пагадненне аб рэалізацыі праектаў з расійскім «Расатамам».
На сайце ўсяго 3 вакансіі для працы ў Беларусі.
У прыватнасці, шукаюць DevOps-інжынера для буйной фінансавай установы. Яшчэ патрэбныя распрацоўшчык HCL Notes Domino (IBM Lotus Notes) і вядучы менеджар па продажы ІТ-прадуктаў і рашэнняў.
Sam Solutions
У беларускім офісе працуе больш за 300 чалавек. Sam Solutions працягвае наймаць супрацоўнікаў. Патрэбныя распрацоўшчыкі для праектаў еўрапейскіх і амерыканскіх кліентаў, Software Support Specialist для праекта буйнога аўтавытворцы, тэсціроўшчык, бізнэс-аналітык.
SoftClub
Кампанія ўваходзіла ў топ-10 найбуйнейшых ІТ-бізнэсаў Беларусі па колькасці супрацоўнікаў. Паводле звестак афіцыйнага сайта, цяпер у SoftClub працуе 1000+ чалавек, у Беларусі — менш за палову. У студзені 2022 года кампанію купіў расійскі распрацоўшчык Softline.
На сайце ўсяго тры вакансіі для працы ў Беларусі. SoftClub шукае Java Developer, Business Analyst, System Analyst.
BELHARD
У кампаніі працуе каля 800 супрацоўнікаў.
Мяркуючы з афіцыйнага сайта, BELHARD актыўна шукае новых людзей для працы ў Беларусі. Кампанія размясціла амаль 20 гарачых вакансій распрацоўшчыкаў, інжынераў, дызайнераў.
ScienceSoft/Научсофт
На глабальным сайце найстарэйшай ІТ-кампаніі Беларусі ScienceSoft даўно няма згадак пра Беларусь (у Еўропе кампанія працуе яшчэ ў Латвіі, Фінляндыі і Грузіі). Стары рускамоўны сайт scnsoft.by цяпер вядзе на старонку беларускай юрыдычнай асобы — «Научсофт». На сайце пазначана, што ў кампаніі працуе больш за 700 чалавек.
Тамсама размешчана 11 вакансій для працы ў Беларусі. Кампаніі патрэбныя распрацоўшчыкі, Інжынеры, аналітыкі і спецыяліст па інфармацыйнай бяспецы.
Чытачы! Мы перажылі яшчэ адзін складаны год. У 2023 нашая каманда працягвала сачыць за беларускім ІТ і трымала вас у курсе самага важнага.
Без вас у нас бы не атрымалася! Вы дзеліцеся з намі досведам і інсайдамі, расказваеце гісторыі, смешныя і сумныя, ствараеце дыскусіі — робіце ўсё, каб беларускае ІТ працягвала жыць, нягледзячы на межы і адлегласці. dev.by быў і застаецца месцам сустрэчы нашых чытачоў, дзе б яны не знаходзіліся.
Мы працягваем працаваць, у тым ліку дзякуючы вам. У 2023 нам заданацілі 678 чалавек. Гэта неверагодна кранальна і моцна дапамагае нам працаваць далей і верыць у будучыню dev.by. Але нам усё яшчэ патрэбная падтрымка. Вашыя данаты дапамагаюць выплачваць заробкі журналістам.
Даб’ём да 700?
Падтрымайце нас:
— Праз Patreon
— Праз Donorbox (калі вы ў Беларусі)
— Крыптой, тут гаманцы.
Дзякуй!
Читать на dev.by