Алеся Чапкевич bel 19 лістапада 2025, 14:54

Літва адкрывае мяжу з Беларуссю

Літоўскі ўрад сёння вырашыў адкрыць мяжу з Беларуссю раней 30 лістапада, як планавалі першапачаткова. Пра гэта паведамляе мясцовы партал LRT.

Пакінуць каментарый

Літоўскі ўрад сёння вырашыў адкрыць мяжу з Беларуссю раней 30 лістапада, як планавалі першапачаткова. Пра гэта паведамляе мясцовы партал LRT.

Гаворка ідзе пра пункты пропуску Мядзінінкай (Каменны лог) і Шальчынінкай (Беняконі), якія былі часова зачыненыя больш за два тыдні. Яны запрацуюць з чацвярга, 20 лістапада.

«Улічваючы рашэнні Нацыянальнай камісіі бяспекі, прынятыя 18 лістапада гэтага года, што абставіны змяніліся і абмежаванні на перасячэнне дзяржаўнай мяжы, устаноўленыя 29 кастрычніка 2025 г. (…) больш не з’яўляюцца неабходнымі для забеспячэння ўнутранай бяспекі, мэтазгодна адмяніць абмежаванні, устаноўленыя згаданай пастановай (…)», — заявіў на пасяджэнні міністр унутраных спраў Уладзіслаў Кандратовіч.

Прэм’ер-міністр Літвы Інга Ругінене падкрэсліла, што калі ўзровень пагрозы з беларускага боку павысіцца, то мяжу зноў зачыняць.

Нагадаем, рашэнне прыпыніць работу двух пагранпераходаў улады Літвы прынялі з-за кантрабандных метэазондаў, якія парушалі работу аэрапортаў. У адказ беларускі бок заблакаваў літоўскія фуры, што стварыла праблемы для мясцовых перавозчыкаў. На гэтым фоне два пункты пропуску на мяжы з Беларуссю — Брузгі і Берастовіцу — 17 лістапада адкрыла Польшча.